اۋىل شارۋاشىلىعى جانە قايتا وڭدەۋ ونەركاسىبى قىزمەتكەرلەرىنىڭ كۇنى اباي وبلىسىندا كەڭ كولەمدە اتالىپ ءوتتى. سەمەيدەگى اباي اتىنداعى كىتاپحانادا ۇيىمداستىرىلعان «التىن كۇز» سالتاناتتى شاراسى اياسىندا ءوڭىردىڭ اگرارلىق سالاسىندا ەڭبەك ەتىپ جۇرگەن ۇزدىك ماماندار ماراپاتتالدى.
اۋىل شارۋاشىلىعى ەڭبەككەرلەرىنىڭ مەرەكەسىندە قۇتتىقتاۋ ءسوز سويلەگەن وبلىس اكىمى بەرىك ءۋالي ايماقتىڭ اۋىل شارۋاشىلىعى سالاسىندا اتقارىلىپ جاتقان جۇمىستارعا، اگروسالانىڭ الداعى باعىت-باعدارىنا توقتالدى.
«مەملەكەت باسشىسى قاسىم-جومارت كەمەلۇلى توقاەۆ اۋىل شارۋاشىلىعى ەڭبەككەرلەرىنىڭ فورۋمىندا سويلەگەن سوزىندە «جالپى، مەملەكەت پەن بيزنەس اۋىلداعى بارلىق ماسەلەنى بىرلەسىپ شەشۋى كەرەك. اگروونەركاسىپپەن اينالىسۋ ءۇشىن اۋىلعا كەلگەن جاس كاسىپكەرلەردى باعالايمىن. مەملەكەت تە سىزدەردىڭ ەڭبەكتەرىڭىزدى ۇمىت قالدىرمايدى. جاۋاپكەرشىلىگى مول كاسىپكەرلەر مەن ينۆەستورلار عانا ەلدەگى وڭ وزگەرىستەردىڭ ناعىز كوشباسشىسى بولا الادى. مەملەكەت سىزدەرگە جان-جاقتى قولداۋ كورسەتىپ، لايىقتى باعالايدى» دەپ ايرىقشا اتاپ وتكەن بولاتىن. اباي وبلىسىنىڭ اۋىل شارۋاشىلىعى سالاسى تۇراقتى دامىپ كەلەدى. وسى جىلدىڭ 10 ايىندا اۋىل شارۋاشىلىعىنىڭ جالپى ءونىم كولەمى 404,3 ملرد تەڭگەنى قۇراپ، ناقتى كولەم يندەكسى 100,8 پايىزعا جەتتى. مال شارۋاشىلىعىندا 105,2 پايىز ءوسىم بولسا، قايتا وڭدەۋ سالاسىندا جاڭا زاۋىتتار ىسكە قوسىلىپ، تەحنيكا پاركى جاڭارتىلۋدا. بۇل باعىتتا 15 ملرد تەڭگەدەن استام سۋبسيديا جانە جەڭىلدەتىلگەن نەسيەلەر بەرىلدى، 446 بىرلىك جاڭا اۋىل شارۋاشىلىعى تەحنيكاسى الىنىپ، ەڭبەك ونىمدىلىگىن ارتتىرۋعا مۇمكىندىك جاسالدى. بۇل جەتىستىكتەر – مەملەكەت باسشىسىنىڭ، ۇكىمەتتىڭ قولداۋى جانە سىزدەردىڭ ماڭداي تەرىڭىزدىڭ، قاجىرلى ەڭبەكتەرىڭىزدىڭ ناتيجەسى. اۋىل ەڭبەككەرلەرىنىڭ كۇندەلىكتى ەڭبەگى وبلىس تۇرعىندارىن ساپالى ازىق-تۇلىك ونىمدەرىمەن قامتاماسىز ەتىپ قانا قويماي، ءوڭىر ەكونوميكاسىنىڭ دامۋىنا ەلەۋلى ۇلەس قوسۋدا. سىزدەرگە شىن جۇرەكتەن العىسىمدى بىلدىرە وتىرىپ، ەڭبەكتەرىڭىزگە مول تابىس، زور دەنساۋلىق، وتباسىلارىڭىزعا اماندىق پەن باق-بەرەكە تىلەيمىن»، – دەدى ايماق باسشىسى.
مەملەكەتتىك قولداۋ شارالارىنىڭ ارقاسىندا 10 ايدا 112,5 مىڭ توننا ەت (5,2% ءوسىم) جانە 275,2 مىڭ توننا ءسۇت (6,2% ءوسىم) ءوندىرىلدى. بيىل وڭىردە 349 مىڭ توننا استىق، 258 مىڭ توننا كارتوپ پەن كوكونىس، 502,9 مىڭ توننا مايلى داقىلدار جينالدى. وبلىستىڭ اۋىل شارۋاشىلىعى سالاسىنا جىل باسىنان بەرى 45,9 ملرد تەڭگە ينۆەستيتسيا تارتىلىپ، جالپى قۇنى 12,8 ملرد تەڭگە بولاتىن 8 ينۆەستيتسيالىق جوبا ىسكە قوسىلدى.
مەرەكەلىك شارا بارىسىندا اۋىل شارۋاشىلىعىندا ەڭبەگىمەن ەرەكشەلەنگەن جاندارعا مەملەكەتتىك جانە سالالىق ماراپاتتار تاپسىرىلدى. «اي-ار» جشس باسشىسى ەربول قابدراحمانوۆ، «پريرتىش برويلەر قۇس فابريكاسى» جشس ديرەكتورى بالتابەك ناۋرىزباەۆ «قۇرمەت» وردەنىمەن ماراپاتتالدى. «اراي East Food» جشس باس تەحنولوگى ليۋدميلا بالاشوۆا، «كوكجىرا» وندىرىستىك كووپەراتيۆىنىڭ توراعاسى نۇرلان مارقاباەۆ (اقسۋات اۋدانى), «جاسمين» شارۋا قوجالىعىنىڭ باسشىسى ەۆگەني جبراتوۆ (بورودۋليحا اۋدانى), «BA AgroGroup» جشس مەحانيزاتورى مۇحامەدحان اسانبەكوۆ (بەسقاراعاي اۋدانى), «سادۋ» شارۋا قوجالىعىنىڭ باسشىسى سەرىك مىرزابەكوۆ (جاڭاسەمەي اۋدانى) III دارەجەلى «ەڭبەك داڭقى» وردەنىن الدى. ەڭبەك ادامدارى مەن سالا ۇزدىكتەرىنە «ەرەن ەڭبەگى ءۇشىن»، «ەڭبەك ارداگەرى» مەدالدارى، «اۋىل شارۋاشىلىعى سالاسىنىڭ ۇزدىگى»، «اباي وبلىسىنا سىڭىرگەن ەڭبەگى ءۇشىن» توسبەلگىلەرى، قازاقستان رەسپۋبليكاسى پرەمەر-ءمينيسترى مەن وبلىس اكىمىنىڭ العىس حاتتارى، قۇرمەت گراموتالارى بەرىلدى.
ەرەكشە اتاپ وتەرلىگى، بيىل العاش رەت اۋىل شارۋاشىلىعى سالاسىنىڭ وزاتتارىنا 10 اۆتوكولىكتىڭ كىلتى سىيعا تارتىلدى. ولار «ۇزدىك شوپان»، «ۇزدىك زووتەحنيك»، «ۇزدىك مەحانيزاتور»، «ۇزدىك كومباينشى»، «ۇزدىك باقتاشى»، «ۇزدىك اگرونوم»، «ۇزدىك ديقانشى»، «ۇزدىك جاس مامان»، «ۇزدىك تەحنولوگ»، «ۇزدىك تراكتورشى» سياقتى نوميناتسيالار بويىنشا انىقتالدى.
وبلىس اكىمى سالتاناتتى شارا اياسىندا ۇيىمداستىرىلعان كورمەنى تاماشالاپ، ءوڭىردىڭ ءىرى جانە شاعىن كاسىپورىندارى ۇسىنعان ونىمدەرمەن تانىستى.
