استانا–الماتى باعىتىنداعى KC622 رەيسىندە ءبىر جولاۋشىنىڭ دەنساۋلىعى كۇرت ناشارلاپ، بورتتا توتەنشە جاعداي بولدى، دەپ حابارلايدى "ادىرنا" ۇلتتىق پورتالى.
وقيعا تۋرالى وسى ۇشاقتا بولعان قازاقستاندىق Threads پلاتفورماسىندا جازبا جاريالاعان. جازبادا:
"ۇشاق ۇشۋعا دايىندالىپ جاتقان. كەنەت “ستيۋاردەسسا! ستيۋاردەسسا! قىزعا جامان بولىپ كەتتى، دارىگەر كەرەك!” دەدى", – دەپ جازدى كۋاگەر.
ايتۋىنشا، ءوزىن جايسىز سەزىنگەن جولاۋشىعا جەدەل تۇردە بورتتا وتىرعان ايەل كەلىپ كومەك كورسەتكەن. جەلى قولدانۋشىلارى كومەك كورسەتكەن دەنساۋلىق ساقتاۋ ءمينيسترى اقمارال ءالنازاروۆا ەكەنىن جازعان.
ول قىزدىڭ قان قىسىمىن ولشەپ، ونىڭ وتە جوعارى ەكەنىن انىقتاعان. وسى ۋاقىتتا ستيۋاردەسسالار سالفەتكا، پاكەت جانە سۋ اكەلىپ، قاجەتتى كومەكتى ۇيىمداستىرۋعا تىرىسقان. قىزدى جۇرەك اينۋ مازالاعان.
جولاۋشىعا ءدارى، سۋ جانە شاي بەرىلگەننەن كەيىن ونىڭ جاعدايى ءبىرشاما جاقسارعان. ستيۋاردەسسا كومەك كورسەتىپ جاتقان ايەلدەن: ء"سىز دارىگەرسىز بە، الدە بىرگە كەلە جاتقان ادامسىز با؟" دەپ سۇراعاندا، ول جاي عانا "دارىگەر" دەپ جاۋاپ بەرگەن.
ۇشاق ەكيپاجى قىزدىڭ ءوزىن قالاي سەزىنەتىنىن سۇراپ، ونىڭ ءارى قاراي ۇشۋعا دايىن ەكەنىن راستاعاننان كەيىن رەيس ءوز كەستەسىمەن جالعاستى.
