بەلگىلى اقىن باقىت بەدەلحان ايەلدەر تۋرالى ايتقان پىكىرىنە تۇسىنىكتەمە بەرىپ، قوعام سىنىنا جاۋاپ بەردى، دەپ حابارلايدى «ادىرنا» ءتىلشىسى.
«وتان وتباسىدان باستالادى» دەيمىز عوي. ال وتباسىڭ اجىراسىپ، ويران بولىپ جاتىرسا، وتان تۋرالى ويلاي الاسىڭ با؟ مەن وسىنى ايتقىم كەلدى. ايەل – كەز كەلگەن وتباسىنىڭ تىرەگى. «ايەل كۇلسە، الەم كۇلەدى» دەپ اقىندارىمىز جىرلاعان. قازىر ايەل جىندانعان سوڭ الەم، قوعام جىندانىپ جاتىر. بالكىم، وعان ءبىزدىڭ بيلىكتەگى جۇيە مەن يدەولوگيانىڭ جوقتىعى سەبەپ شىعار. كەيبىر دۇنيەگە شەكتەۋ بولۋى ءتيىس. كەيدە ساحناعا ەۋروپانىڭ قاڭسىعىن اكەلىپ، سونى قويىپ جاتادى. تۇرمىس-تىرشىلىگىندەگى ادام سەنبەيتىن قاراما-قايشىلىقتاردى، يتتىكتەردى كوشىرىپ الادى دا، شەتەلدىك كلاسسيكانى ساحنالادىق دەيدى. ال ول ءبىزدىڭ ۇلتتىق مۇددەمىزگە كەلە مە؟ وسىنى قاداعالاۋ كەرەك»،-دەدى ول «Barys Media» ارناسىنا بەرگەن سۇقباتىندا.
اقىن ايەلدەر تاقىرىبىن قايتا-قايتا قوزعاۋدىڭ قورقىنىشتى ەكەنىن جەتكىزدى.
«مەن ءولىپ، تابىتىمدى جاپقان كۇنى عانا ايەلدەر تۋرالى ايتامىن» دەگەن تولستويدىڭ ءسوزى بار. سول سياقتى بۇل تاقىرىپتى قوزعاۋ قيىن. پەندە بولعان سوڭ ەشكىم ءمىنسىز ەمەس. ءبىزدىڭ ۇلتتى جاۋلاۋ ءۇشىن وق شىعىنداپ، جەندەت جالداۋدىڭ قاجەتى جوق. ءبىز ونسىز دا جۇتىلىپ بارا جاتىرمىز، قۇداي ساقتاسىن. ۇلتتى تامىرىنان اجىراتىپ، تالقانداۋ ءۇشىن ايەلدەردى بۇزۋ كەرەك. قىتايدا باسقالارمەن سالىستىرعاندا اناۋ ايتقانداي قىرعىن سوعىستار جوق. ولار ايەل ارقىلى جاۋلاۋعا تىرىسادى»،-دەدى باقىت بەدەلحان.
ول ايەل دۇرىس بولماعان ۇيدە بەرەكە بولمايتىنىن اتاپ ءوتتى.
«بەرەكە بولماعان جەردە مەيىرىم بولمايدى. جالا جاپقىم كەلمەيدى، بىراق قازىر ادامزاتتىڭ جۇيكەسى كەتكەن زامان بولدى. مادەني سۇرىپتاۋلاردان وتكەن ەۋروپا قالپىنا كەلىپ الدى. ال ءبىزدىڭ ولارعا بىردەن ەلىكتەۋگە قاۋقارىمىز جەتپەيدى. ەۋروپالىقتار 70-80 جاسقا كەلگەنشە وزدەرىن عانا كۇتىپ جۇرەدى. بىزدەگىدەي 10 بالا، 20 ناعاشى، قۇدا-جەكجات دەگەندەر جوق. ولار وزدەرىنىڭ تۇسىنىگىن قازاقتىڭ ورتاسىنا تاستاي سالدى. ءبىزدىڭ ايەلدەر «نەگە ءوزىمدى عانا ويلاماسقا؟»، «نەگە ەكەۋمىز عانا قول ۇستاسىپ، قىدىرمايمىز؟» دەگەن ويدا قالدى. جاقسى، بارلىعىن ارالاپ، كورسىن. ال تامىرىڭ، ۇلتىڭ، ءداستۇر-سالتىڭ قايدا قالادى؟ ءبىز وسىلاردى ۇمىتىپ بارا جاتىرمىز»،-دەپ قوستى اقىن.
