بۇگىن، 30 قاراشا قىرعىزستاندا جوگوركۋ كەنەشتىڭ (پارلامەنتتىڭ) كەزەكتەن تىس سايلاۋى ءوتىپ جاتىر. بۇعان دەيىن ەكى اي بۇرىن جوگوركۋ كەنەش ءوز وكىلەتتىك مەرزىمى اياقتالۋىنا ءبىر جىل قالعاندا ءوزىن-ءوزى تاراتۋ تۋرالى شەشىم قابىلداعان، دەپ حابارلايدى “ادىرنا”.
نەگىزگى سايلاۋعا دايىندىق شەڭبەرىندە قازان ايىندا ەلدىڭ بارلىق ايماعىندا سىناقتىق داۋىس بەرۋ وتكىزىلدى.
قازىر قىرعىز رەسپۋبليكاسىنىڭ ورتالىق سايلاۋ كوميسسياسى ءۇش ساياسي پارتيادان ءوتىنىم قابىلداپ وتىر. ولار — «كىرك ۋز»، «لەگاللايز» جانە «ىنتىماك» پارتيالارى.
سايلاۋ قارساڭىندا بيلىك وپپوزيتسياعا قىسىمدى كۇشەيتىپ، بىرقاتار تاۋەلسىز اقپارات قۇرالدارىنىڭ جۇمىسىن توقتاتتى. ساراپشىلار سايلاۋدا باسەكەلەستىك بارىن اتاپ وتكەنمەن، جاڭا پارلامەنت پرەزيدەنت سادىر جاپاروۆقا بۇرىنعىدان دا تاۋەلدى بولاتىنىن ايتادى.
رەسمي دەرەك بويىنشا، كەزەكتەن تىس سايلاۋ وتكىزۋ – پارلامەنتتىك جانە پرەزيدەنتتىك سايلاۋلاردىڭ مەرزىمىن اجىراتۋ قاجەتتىلىگىمەن تۇسىندىرىلگەن.
RFI باسىلىمىنىڭ جازۋىنشا، پرەزيدەنتتىك سايلاۋ 2027 جىلدىڭ باسىنا جوسپارلانعان. بىراق تاۋەلسىز ساراپشىلاردىڭ پىكىرىنشە، بۇل قادام بيلىككە ساياسي تاۋەكەلدەردى ازايتۋعا مۇمكىندىك بەرەدى.
ساياساتتانۋشى ەميل دجۋراەۆتىڭ ايتۋىنشا، بيلىك ەليتاسى ءۇشىن پرەزيدەنتتىك سايلاۋ الدىندا تۇراقتى پارلامەنتتىڭ بولۋى ماڭىزدى. ونىڭ پىكىرىنشە، بيلىك پرەزيدەنت سايلاۋىنا ءبىر-ەكى اي قالعاندا كۇتپەگەن «ساياسي توسىنسىيعا» تاپ بولماۋدى كوزدەيدى.
