بەلگىلى اكادەميك، فيلوسوفيا عىلىمىنىڭ دوكتورى، پروفەسسور جابايحان ءابدىلدين 93 جاسقا قاراعان شاعىندا كوز جۇمدى. قارالى حاباردى مادەنيەت جانە اقپارات مينيسترلىگى جەتكىزدى، دەپ حابارلايدى «ادىرنا» ءتىلشىسى.
«كورنەكتى عالىم جانە مەملەكەت قايراتكەرى جابايحان مۇباراكۇلى ءابدىلديننىڭ دۇنيەدەن وتۋىنە بايلانىستى تۋعان-تۋىستارى مەن جاقىندارىنا، تۋعان حالقىنا قايعىرا كوڭىل ايتامىز.
جابايحان مۇباراكۇلى – قازاق عىلىمىنىڭ ەڭ كورنەكتى وكىلدەرىنىڭ ءبىرى، وتاندىق فيلوسوفيا مەن ديالەكتيكالىق لوگيكا مەكتەبىنىڭ نەگىزىن قالاعان بىرەگەي تۇلعا. ول عىلىمعا ءبۇتىن ءبىر ءداۋىر سىيلاپ، تەوريالىق تانىمنىڭ تەرەڭ ماسەلەلەرىن زەرتتەۋدە وشپەس ءىز قالدىردى.
ۇلتىنا ادال قىزمەت ەتكەن ابزال ازاماتتىڭ جانى ءجانناتتا، يمانى سالامات بولعاي!»- دەلىنگەن حابارلامادا.
جابايحان مۇباراكۇلى 1933 جىلى پاۆلودار وبلىسىندا دۇنيەگە كەلگەن. عالىمنىڭ جەتەكشىلىگىمەن 10 عىلىم دوكتورى جانە 40-قا جۋىق عىلىم كانديداتى دايارلانعان.
ءابدىلديننىڭ ەڭبەكتەرى ديالەكتيكالىق لوگيكانىڭ تەوريالىق-مەتودولوگيالىق ماسەلەلەرىن تەرەڭ تالداۋمەن ەرەكشەلەنەدى. ول 2000 جىلى «بارىس» وردەنىنىڭ II دارەجەسىمەن، كەيىن تمد پارلامەنتارالىق اسسامبلەياسىنىڭ «دوستىق» مەدالدارىمەن ماراپاتتالعان. 2022 جىلى «بارىس» وردەنىنىڭ III دارەجەسىن يەلەنگەن.
