الماتىدا 12 جاستاعى بالانىڭ ولىمىنە قاتىستى قىلمىستىق ءىس تەرگەلىپ جاتىر، دەپ حابارلايدى "ادىرنا".
قايعىلى وقيعا تۋرالى اقپارات 2026 جىلعى 11 ماۋسىمدا الەۋمەتتىك جەلىلەردە تارادى.
جەلى قولدانۋشىلارىنىڭ مالىمەتىنشە، 10 ماۋسىم كۇنى كەشكە 12 جاستاعى بالاعا شابۋىل جاسالعان. كەيبىر دەرەكتەردە وعان 13 جاستاعى ەكى ءجاسوسپىرىم توعىز رەت پىشاق سۇققانى ايتىلعان. سونداي-اق كۇدىكتىلەردىڭ جاسىنا بايلانىستى ولاردىڭ زاڭ الدىندا ءتيىستى جازاعا تارتىلماۋى مۇمكىن دەگەن پىكىرلەر دە ايتىلدى.
الماتى قالالىق پوليتسيا دەپارتامەنتىنىڭ مالىمەتىنشە، قىلمىس 10 ماۋسىم كۇنى تۇركسىب اۋدانىندا بولعان.
"قىلمىس جاسادى دەگەن كۇدىكپەن الماتى قالاسىنىڭ 13 جاستاعى تۇرعىنى ۇستالدى. الدىن الا مالىمەت بويىنشا، كۇدىكتى مەن مارقۇم ءبىر-ءبىرىن بۇرىننان تانىعان. جاسوسپىرىمدەر اراسىندا تۋىنداعان جانجال بارىسىندا جابىرلەنۋشىگە پىشاق جاراقاتتارى سالىنعانى انىقتالدى. قازىرگى ۋاقىتتا كۇدىكتى ارنايى مەكەمەگە ورنالاستىرىلدى. اتالعان دەرەك بويىنشا ادام ءولتىرۋ فاكتىسىمەن قىلمىستىق ءىس قوزعالدى. وقيعانىڭ بارلىق ءمان-جايىن جان-جاقتى جانە وبەكتيۆتى انىقتاۋ ماقساتىندا تەرگەۋ امالدارى جۇرگىزىلىپ جاتىر", – دەپ حابارلادى پوليتسيا.
سونىمەن قاتار، تەرگەۋ ناتيجەسىنە قاراي كۇدىكتى ءجاسوسپىرىمنىڭ اتا-اناسىن بالانى تيىسىنشە تاربيەلەمەگەنى ءۇشىن جاۋاپكەرشىلىككە تارتۋ ماسەلەسى قارالاتىنى ايتىلدى.
