المالى اۋداندىق سوتىندا ءوزىنىڭ ارىپتەسىن ابايسىزدا اتىپ ولتىرگەن پوليتسەيگە ۇكىم شىقتى. بۇل تۋرالى الماتى قالاسىنىڭ سوتى مالىمدەدى، دەپ حابارلايدى “ادىرنا” ۇلتتىق پورتالى.
ايتا كەتەيىك، قايعىلى وقيعا بىلتىر جازدا بولعان ەدى.
«سوتتالۋشى عيماراتتى كۇزەتۋ بويىنشا اۋىسىمعا كەلگەن. ءارى قاراي ونىڭ ارىپتەسى تابەلدىك قارۋدى العاننان كەيىن ك. ەسىمدى سوتتالۋشىدان بەلبەۋىن بەكىتۋ ءۇشىن قارۋدى ۇستاي تۇرۋىن وتىنگەن. تابەلدىك قارۋدى العان سوتتالۋشى ونى قولدانۋدىڭ بارلىق ەرەجەلەرىن ەلەمەي، تومەن جانە جوعارى تەربەتە باستاعان. سالدارىنان سوتتالۋشىنىڭ ابايسىزدا اتقان وعى مارقۇمنىڭ باسىنا تيگەن»، - دەلىنگەن قالالىق سوت حابارلاماسىندا.
سوتتالۋشى ءوز كىناسىن تولىق مويىنداپ، جاساعان ىسىنە وكىنگەن. ال پروكۋرور ونى 1 جىل 6 ايعا باس بوستاندىعىنان ايىرۋ جازاسىن سۇراعان.
«سوت قىلمىستىق كودەكستىڭ 104-بابى 1-بولىگىمەن سوتتالۋشىنى 1 جىل 6 اي باس بوستاندىعىنان ايىرۋعا ۇكىم شىعاردى. ودان جابىرلەنۋشىنىڭ تۋىستارىنا 10 ملن تەڭگە مورالدىق زالال جانە شامامەن 3,5 ملن تەڭگە ماتەريالدىق زالال ءوندىرىپ الىندى»، - دەپ مالىمدەدى ۆەدومستۆو.
