الماتى وبلىسىنىڭ بالقاش اۋدانىندا پوليتسيا ءبولىمى باستىعىنىڭ ورىنباسارى ايەلىن قىزمەتتىك كولىكپەن قاعىپ ءولتىردى دەگەن كۇدىكپەن ۇستالدى. بۇل تۋرالى Polites News جازدى، دەپ حابارلايدى "ادىرنا".
الدىن الا اقپارات بويىنشا، قايعىلى وقيعا 16 مامىردا شامامەن تاڭعى ساعات 5:04-تە قوناەۆ-باقاناس تاس جولىندا بولعان.
اۋدان پروكۋرورى، ونىڭ ورىنباسارى، كەزەكشى پروكۋرور جانە الماتى وبلىسى پوليتسيا دەپارتامەنتىنىڭ تەرگەۋ توبى وقيعا ورنىنا جەتكەن.
الدىن الا تەرگەۋ مالىمەتتەرى بويىنشا بالقاش اۋداندىق پوليتسيا ءبولىمى باستىعىنىڭ ورىنباسارى باۋىرجان قابدىلدانوۆ Hyundai Elantra كولىگىن جۇرگىزىپ كەلە جاتقان. كولىكتە ونىمەن بىرگە ايەلى دە بولعان.
كۇدىكتىنىڭ سوزىنشە، باقاناس اۋىلىنا قاراي كەلە جاتقاندا ەرلى-زايىپتى اراسىندا داۋ تۋىنداعان. ايەل كولىكتەن شىققىسى كەلىپ، ەسىكتى اشپاق بولىپتى. وسىدان كەيىن ول كولىكتى باقباقتى اۋىلىنىڭ ماڭىندا توقتاتىپ، ايەلىن ءتۇسىرىپ، كولىك جۇرگىزۋدى جالعاستىرعان. شامامەن 2-3 شاقىرىم ءجۇرىپ وتكەننەن كەيىن ايەلىن الىپ كەتۋ ءۇشىن ارتقا قايتقان دەيدى.
ايەل قوناەۆ-باقاناس تاس جولىنىڭ 84-شاقىرىمىنداعى جولدىڭ ورتاسىندا وتىرعان. جۇرگىزۋشى ونى بايقاماي قالىپ، قاعىپ كەتكەنىن ايتتى.
ايەل العان جاراقاتتارىنان وقيعا ورنىندا مەرت بولدى.
سونداي-اق قابدىلدانوۆ قىزمەتتىك كولىكتى جۇرگىزگەنى بەلگىلى بولدى. 15 مامىردا ول پوليتسيا بولىمىندە قارالىپ جاتقان قىلمىستىق ىستەر بويىنشا سوت-مەديتسينالىق ساراپتاما تاعايىنداۋ ءۇشىن قوناەۆ قالاسىنا بارعان.
وقيعا سوتقا دەيىنگى تەرگەۋدىڭ بىرىڭعاي تىزىلىمىنە قىلمىستىق كودەكستىڭ 345-بابىنىڭ 3-بولىگى “جول قوزعالىسى ەرەجەلەرىن نەمەسە كولىك قۇرالىن پايدالانۋ ەرەجەلەرىن بۇزۋ ارقىلى ولىمگە اكەپ سوقتىرۋ” بويىنشا تىركەلدى.
كۇدىكتى باۋىرجان قابدىلدانوۆ ۋاقىتشا ۇستاۋ يزولياتورىنا قامالدى.
پوليتسيا وقيعانىڭ ءمان-جايىن تەكسەرىپ جاتىر.
