Almaty oblysynyŋ Balqaş audanynda polisiia bölımı bastyǧynyŋ orynbasary äielın qyzmettık kölıkpen qaǧyp öltırdı degen küdıkpen ūstaldy. Būl turaly Polites News jazdy, dep habarlaidy "Adyrna".
Aldyn ala aqparat boiynşa, qaiǧyly oqiǧa 16 mamyrda şamamen taŋǧy saǧat 5:04-te Qonaev-Baqanas tas jolynda bolǧan.
Audan prokurory, onyŋ orynbasary, kezekşı prokuror jäne Almaty oblysy polisiia departamentınıŋ tergeu toby oqiǧa ornyna jetken.
Aldyn ala tergeu mälımetterı boiynşa Balqaş audandyq polisiia bölımı bastyǧynyŋ orynbasary Bauyrjan Qabdyldanov Hyundai Elantra kölıgın jürgızıp kele jatqan. Kölıkte onymen bırge äielı de bolǧan.
Küdıktınıŋ sözınşe, Baqanas auylyna qarai kele jatqanda erlı-zaiypty arasynda dau tuyndaǧan. Äiel kölıkten şyqqysy kelıp, esıktı aşpaq bolypty. Osydan keiın ol kölıktı Baqbaqty auylynyŋ maŋynda toqtatyp, äielın tüsırıp, kölık jürgızudı jalǧastyrǧan. Şamamen 2-3 şaqyrym jürıp ötkennen keiın äielın alyp ketu üşın artqa qaitqan deidı.
Äiel Qonaev-Baqanas tas jolynyŋ 84-şaqyrymyndaǧy joldyŋ ortasynda otyrǧan. Jürgızuşı ony baiqamai qalyp, qaǧyp ketkenın aitty.
Äiel alǧan jaraqattarynan oqiǧa ornynda mert boldy.
Sondai-aq Qabdyldanov qyzmettık kölıktı jürgızgenı belgılı boldy. 15 mamyrda ol polisiia bölımınde qaralyp jatqan qylmystyq ıster boiynşa sot-medisinalyq saraptama taǧaiyndau üşın Qonaev qalasyna barǧan.
Oqiǧa sotqa deiıngı tergeudıŋ bıryŋǧai tızılımıne Qylmystyq kodekstıŋ 345-babynyŋ 3-bölıgı “Jol qozǧalysy erejelerın nemese kölık qūralyn paidalanu erejelerın būzu arqyly ölımge äkep soqtyru” boiynşa tırkeldı.
Küdıktı Bauyrjan Qabdyldanov uaqytşa ūstau izoliatoryna qamaldy.
Polisiia oqiǧanyŋ män-jaiyn tekserıp jatyr.
