الماتى وبلىسىندا «Dog House – تۆاردوۆسكي دوم» جانۋارلار پاناسىن قۇرعان ۆلاديمير تەپلياكوۆتىڭ قازا تاپقانى رەسمي تۇردە راستالدى. بۇل تۋرالى الماتى وبلىسى پوليتسيا دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى Baq.kz سايتىنا سىلتەپ.
پوليتسيانىڭ حابارلاۋىنشا، 2026 جىلعى 7 قازاندا ەر ادامنىڭ ولتىرىلۋىنە بايلانىستى قىلمىستىق ءىس تىركەلگەن. قازىرگى ۋاقىتتا قۇقىق قورعاۋ ورگاندارى كۇدىكتىلەردى انىقتاپ، ۇستاۋعا باعىتتالعان تەرگەۋ جانە جەدەل-ىزدەستىرۋ شارالارىن جۇرگىزىپ جاتىر.
ۆەدومستۆو وكىلدەرى وقيعانىڭ بارلىق ءمان-جايى انىقتالىپ جاتقانىن اتاپ ءوتتى. سونداي-اق قىلمىستىق ءىستىڭ تەرگەلۋ بارىسى دەپارتامەنت باسشىلىعىنىڭ ەرەكشە باقىلاۋىندا ەكەنى ايتىلدى.
بۇعان دەيىن الەۋمەتتىك جەلىلەردە ۆلاديمير تەپلياكوۆتىڭ ءولىمى تۋرالى حابار تاراعان ەدى. كەيبىر جاريالانىمداردا ونىڭ وققا ۇشقانى جونىندە اقپارات بەرىلگەن. الايدا پوليتسيا رەسمي جاۋابىندا ولىمگە اكەلگەن جاراقاتتاردىڭ سيپاتىن ناقتىلامادى.
قىلمىستىق-پروتسەستىك كودەكستىڭ 201-بابىنا سايكەس، تەرگەۋ بارىسىنا قاتىستى وزگە اقپارات جاريالانبايدى.
ۆلاديمير تەپلياكوۆتىڭ قازاسىنان كەيىن «تۆاردوۆسكي دوم» پاناسىندا شامامەن 90 يت قالعان. الەۋمەتتىك جەلىلەردە جانۋارلاردى قورعاۋشىلار يتتەرگە جاڭا يەلەر تابۋعا جانە ولارعا قامقورلىق كورسەتۋگە كومەكتەسىپ جاتقانى تۋرالى حابارلامالار جاريالاندى.
زووقورعاۋشىلاردىڭ ايتۋىنشا، تەپلياكوۆ پاناسىنا كۇن سايىن كەلىپ، جانۋارلاردى تاماقتاندىرىپ، تازالىق جۇمىستارىن جۇرگىزىپ، ولاردىڭ جاعدايىن قاداعالاپ وتىرعان. ونىڭ قايتىس بولۋى پانالاعى جانۋارلارعا قامقورلىق جاساپ جۇرگەن جاندار ءۇشىن اۋىر سوققى بولدى.
قازىرگى ۋاقىتتا پوليتسيا قىزمەتكەرلەرى قىلمىسقا قاتىسى بولۋى مۇمكىن ادامداردى انىقتاۋ جانە ۇستاۋ جۇمىستارىن جالعاستىرىپ جاتىر. ءىس بويىنشا تەرگەۋ امالدارى جۇرگىزىلۋدە.
