24 جەلتوقسانعا قاراعان ءتۇنى ماسكەۋدىڭ وڭتۇستىگىندە جارىلىس بولىپ، سالدارىنان جول-پاترۋلدىك قىزمەتتىڭ ەكى قىزمەتكەرى جانە تاعى ءبىر ادام قازا تاپتى، دەپ حابارلايدى «ادىرنا» ءتىلشىسى gazeta.ru-عا سىلتەمە جاساپ.
تەرگەۋ كوميتەتىنىڭ مالىمەتىنشە، پوليتسەيلەر قىزمەتتىك كولىك ماڭىندا كۇدىكتى ەر ادامدى بايقاپ، ونى ۇستاۋعا ارەكەتتەنگەن. وسى ساتتە جارىلعىش زات ىسكە قوسىلعان. قازا تاپقانداردىڭ ءۇشىنشىسى — ديۆەرسيا جاساۋ ماقساتىندا يۆانوۆو وبلىسىنان ماسكەۋگە ارنايى كەلگەن كۇدىكتى. باق دەرەگىنشە، ول الاياقتاردىڭ ىقپالىمەن «تىڭشىلىق وپەراتسياسىنا» قاتىسۋعا ءماجبۇر بولعان.
ماسكەۋ قالاسىنىڭ مەملەكەتتىك اۆتوينسپەكتسياسى قازا تاپقانداردىڭ 24 جاستاعى پوليتسيا لەيتەنانتى يليا كليمانوۆ پەن 25 جاستاعى پوليتسيا لەيتەنانتى ماكسيم گوربۋنوۆ ەكەنىن جەتكىزدى. mk.ru باسىلىمىنىڭ جازۋىنشا، ولار پودموسكوۆەدەگى ءبىر ەلدى مەكەندە تۇرعان جانە بالا كەزىنەن دوس بولعان. گوربۋنوۆتىڭ ارتىندا جۇبايى مەن توعىز ايلىق قىزى قالدى. ۆەدومستۆو مارقۇمداردىڭ وتباسىلارىنا بارلىق قاجەتتى كومەك كورسەتىلەتىنىن جەتكىزدى.
بۇعان دەيىن وسى اۋداندا گەنەرال-لەيتەنانت فانيل سارۆاروۆتىڭ اۆتوكولىگى جارىلعان بولاتىن. 22 جەلتوقساندا ءدال وسى جەردەن بىرنەشە ءجۇز مەتر قاشىقتىقتا رەسەي باس شتابىنىڭ گەنەرال-لەيتەنانتى فانيل سارۆاروۆ قازا تاپتقان. ونىڭ كولىگىنىڭ استىنا قويىلعان بومبا جارىلعان.
