Almaty oblysynda «Dog House – Tvardovskii dom» januarlar panasyn qūrǧan Vladimir Tepliakovtyŋ qaza tapqany resmi türde rastaldy. Būl turaly Almaty oblysy Polisiia departamentı mälımdedı, dep habarlaidy “Adyrna” ūlttyq portaly Baq.kz saityna sıltep.
Polisiianyŋ habarlauynşa, 2026 jylǧy 7 qazanda er adamnyŋ öltırıluıne bailanysty qylmystyq ıs tırkelgen. Qazırgı uaqytta qūqyq qorǧau organdary küdıktılerdı anyqtap, ūstauǧa baǧyttalǧan tergeu jäne jedel-ızdestıru şaralaryn jürgızıp jatyr.
Vedomstvo ökılderı oqiǧanyŋ barlyq män-jaiy anyqtalyp jatqanyn atap öttı. Sondai-aq qylmystyq ıstıŋ tergelu barysy departament basşylyǧynyŋ erekşe baqylauynda ekenı aityldy.
Būǧan deiın äleumettık jelılerde Vladimir Tepliakovtyŋ ölımı turaly habar taraǧan edı. Keibır jariialanymdarda onyŋ oqqa ūşqany jönınde aqparat berılgen. Alaida polisiia resmi jauabynda ölımge äkelgen jaraqattardyŋ sipatyn naqtylamady.
Qylmystyq-prosestık kodekstıŋ 201-babyna säikes, tergeu barysyna qatysty özge aqparat jariialanbaidy.
Vladimir Tepliakovtyŋ qazasynan keiın «Tvardovskii dom» panasynda şamamen 90 it qalǧan. Äleumettık jelılerde januarlardy qorǧauşylar itterge jaŋa ieler tabuǧa jäne olarǧa qamqorlyq körsetuge kömektesıp jatqany turaly habarlamalar jariialandy.
Zooqorǧauşylardyŋ aituynşa, Tepliakov panasyna kün saiyn kelıp, januarlardy tamaqtandyryp, tazalyq jūmystaryn jürgızıp, olardyŋ jaǧdaiyn qadaǧalap otyrǧan. Onyŋ qaitys boluy panalaǧy januarlarǧa qamqorlyq jasap jürgen jandar üşın auyr soqqy boldy.
Qazırgı uaqytta polisiia qyzmetkerlerı qylmysqa qatysy boluy mümkın adamdardy anyqtau jäne ūstau jūmystaryn jalǧastyryp jatyr. Is boiynşa tergeu amaldary jürgızılude.
