بەلگىلى كاسىپكەر جانە ءانشى، ءماجىلىس دەپۋتاتى داۋلەت تۇرلىحانوۆتىڭ ءىنىسى راحات تۇرلىحانوۆ الماتىدا قايتادان پوليتسيا بولىمىنە جەتكىزىلدى. وعان تاعى دا «وتباسىلىق جانجال شىعارىپ، جۇبايىنا قول كوتەردى» دەگەن ايىپ تاعىلىپ وتىر. بۇل تۋرالى الماتى قالالىق پوليتسيا دەپارتامەنتى جاريالادى، دەپ حابارلايدى "ادىرنا".
مالىمەتكە سايكەس، مەدەۋ اۋدانىندا ورىن العان وتباسىلىق جانجال بويىنشا شاقىرتۋ تۇسكەن. وقيعا ورنىنا جەتكەن ءتارتىپ ساقشىلارى جانجالعا قاتىسۋشىلاردى اۋداندىق باسقارماعا جەتكىزدى.
ايەل ادام باسىندا كۇيەۋىنىڭ فيزيكالىق كۇش كورسەتكەنىن ايتقان. كەيىننەن ول سوققى جەگەنىن جوققا شىعارىپ، تەك وتباسىلىق جانجال دەرەگى بويىنشا ارىز قالدىرعان. ناتيجەسىندە، راحات تۇرلىحانوۆقا قاتىستى قر اقبتك-ءنىڭ 73-بابى 1-بولىگى بويىنشا اكىمشىلىك حاتتاما تولتىرىلدى.
راحات تۇرلىحانوۆ بۇعان دەيىن دە ايەلىن ۇرعانى ءۇشىن بىرنەشە رەت اكىمشىلىك جاۋاپكەرشىلىككە تارتىلىپ، ءتىپتى 10 تاۋلىككە قاماۋعا الىنعان بولاتىن. قۇقىق قورعاۋ ورگاندارىنداعى دەرەككوزدەردىڭ حابارلاۋىنشا، قازىرگى ۋاقىتتا وعان قاتىستى قىلمىستىق ءىس قوزعاۋ ماسەلەسى قاراستىرىلۋدا.
