دەنساۋلىق ساقتاۋ ءمينيسترى اقمارال ءالنازاروۆا الماتىدا جول اپاتىنان كوز جۇمعان 23 جاستاعى فەلدشەر ناسيبا جاڭاباەۆانىڭ تۋعان-تۋىستارىنا كوڭىل ايتتى، دەپ حابارلايدى «ادىرنا» ءتىلشىسى.
«جەدەل مەديتسينالىق جاردەم فەلدشەرى ناسيبا مۇحتارقىزى جاڭاباەۆانىڭ قىزمەتتىك مىندەتىن اتقارۋ كەزىندە قازا تاپقانى تۋرالى قارالى حاباردى تەرەڭ كۇيزەلىسپەن قابىلدادىم.
ناسيبا نەبارى 23 جاستا ەدى، ءتورت اي بۇرىن عانا الماتى قالاسىنىڭ جەدەل جاردەم قىزمەتىنە جۇمىسقا تۇرعان بولاتىن. وسى قىسقا ۋاقىت ىشىندە ول ءوز مىندەتىنە جاۋاپتى، ادال، جاناشىر، ارقاشان كومەك كورسەتۋگە دايىن مەديتسينا قىزمەتكەرى رەتىندە تانىلدى.
ناسيبا مۇحتارقىزىنىڭ تۋعان-تۋىستارىنا، جاقىندارىنا، ارىپتەستەرىنە جانە الماتىنىڭ بۇكىل مەديتسينالىق قاۋىمداستىعىنا قايعىرىپ كوڭىل ايتامىن»،- دەدى ول.
قايعىلى وقيعا 3 جەلتوقسانعا قاراعان ءتۇنى بولعان ەدى. پوليتسەيلەردىڭ مالىمەتىنشە، جەدەل جاردەم بريگاداسىنىڭ جۇرگىزۋشىسى ساين كوشەسىمەن سولتۇستىك باعىتتا كەلە جاتقان. بۇرىلىپ جاتقان ساتتە وڭتۇستىككە قاراي كەلە جاتقان Kia ماركالى اۆتوكولىگىمەن سوقتىعىسقان. اپات سالدارىنان بەس ادام زارداپ شەككەن. ال اۋىر جاراقات العان 23 جاستاعى فەلدشەر بىرنەشە ساعاتتان كەيىن اۋرۋحانادا جان تاپسىرعان.
