ونىڭ قۇتتىقتاۋ حاتى مينيسترلىكتىڭ Telegram-كانالىندا جاريالاندى.
"قۇرمەتتى ۆولونتەرلەر! قۇرمەتتى دوستار! سىزدەردى حالىقارالىق ۆولونتەرلەر كۇنىمەن شىن جۇرەكتەن قۇتتىقتايمىن!
قازىرگى كەزدە ۆولونتەرلىك قوزعالىس ەلىمىزدەگى قوعامدىق ءومىردىڭ اجىراماس بولىگىنە اينالدى. سىزدەر مادەنيەت پەن ءبىلىم، ەكولوگيا مەن مەديتسينا، الەۋمەتتىك قولداۋ مەن قايىرىمدىلىق سالالارىنىڭ دامۋىنا ۇلەس قوسىپ كەلەسىزدەر.
كەيىنگى جىلدارى قازاقستاندا ۆولونتەرلىكتى مەملەكەتتىك قولداۋدىڭ ءبىرتۇتاس جۇيەسى قالىپتاستى، ول ارقاشان مەملەكەتتىك ساياساتتىڭ نازارىندا.
ءدال بۇگىن بۇۇ-نىڭ نيۋ-يورك قالاسىنداعى شتاب-پاتەرىندە ورنىقتى دامۋ جولىنداعى حالىقارالىق ۆولونتەرلەر جىلى رەسمي باستاۋىن الادى.
اتالعان جىلدى جاريالاۋ تۋرالى ۇسىنىس قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆتىڭ باستاماسىمەن جۇزەگە اسقانىن ماقتان تۇتامىز", دەلىنگەن جازباسىندا.
سونداي-اق، ول قازاقستان ءۇشىن حالىقارالىق جىل ورنىقتى دامۋ ماقساتتارىن ىسكە اسىرۋداعى ۆولونتەرلەردىڭ رولىنە باسا نازار اۋدارا وتىرىپ "بىرگە – تۇراقتى بولاشاق ءۇشىن!" ۇرانىمەن جاقسىلىق پەن بىرلىكتىڭ جالپىحالىقتىق مەرەكەسىنە اينالاتىنىن ايتتى.
"مەملەكەت سىزدەردىڭ بەلسەندىلىگىڭىزدى، ازاماتتىق ۇستانىمىڭىز بەن جاسامپاز ىستەرىڭىزدى جوعارى باعالايدى. ءبىز ۆولونتەرلىك باستامالاردى ودان ءارى قولدايمىز جانە دامۋ ءۇشىن مۇمكىندىكتەردى ارتتىرامىز.
بارلىق ۆولونتەرلەرگە ەلىمىزدىڭ دامۋىنا قوسقان ۇلەسى، تاباندىلىعى، مەيىرىمدىلىگى مەن ءوز ىسىنە ادالدىعى ءۇشىن شىن جۇرەكتەن العىس ايتامىن. سىزدەردىڭ يگى ىستەرىڭىز ارقاشان قۇرمەت پەن قولداۋ تاۋىپ، ادامدارعا قۋانىش پەن شاتتىق اكەلسىن.
سىزدەرگە زور دەنساۋلىق، اماندىق، كۇش-قۋات جانە قوعامعا قىزمەت ەتۋ جولىندا تابىس تىلەيمىن", - دەدى مينيستر.
