1917 جىلعى جەلتوقساندا ورىنبوردا وتكەن ەكىنشى جالپىقازاق سەزى قازاق تاريحىنداعى اسا ماڭىزدى ساياسي بەتبۇرىستاردىڭ ءبىرى بولدى. 5–13 جەلتوقسان ارالىعىنداعى بۇل تاريحي جيىندا الاش اۆتونومياسى جاريالانىپ، ءاليحان بوكەيحان توراعالىق ەتكەن الاشوردا ۇكىمەتى قۇرىلدى. قازاق حالقىنىڭ حح عاسىرداعى العاشقى ۇلتتىق مەملەكەتتىك باسقارۋ جۇيەسى وسىلاي قالىپتاسىپ، ەلدىڭ اۆتونومياسى، قاۋىپسىزدىگى مەن ۇلتتىق مۇددەسىن قورعاۋعا باعىتتالعان جاڭا كەزەڭ باستالدى.
سەزد توراعاسى بولىپ بەلگىلى قوعام قايراتكەرى ءاليحان بوكەيحان سايلاندى. بۇل – قازاق حالقىنىڭ حح عاسىرداعى العاشقى ۇلتتىق ۇكىمەتى ەدى.
سەزد قازاق ولكەسىنىڭ ساياسي مارتەبەسىن تالقىلاپ، اۆتونوميا قۇرۋ تۋرالى شەشىم قابىلدادى. بۇل شەشىم قازاق قوعامىنىڭ ءوز جەرىن، قۇقىعىن، ۇلتتىق مۇددەسىن قورعاۋ باعىتىندا جاڭا كەزەڭ باستاعانى دەپ باعالانادى.
سەزد بارىسىندا ەلدىڭ قاۋىپسىزدىگىن قامتاماسىز ەتۋ ءۇشىن حالىق ميليتسياسىن قۇرۋ، ياعني ۇلتتىق اسكەري كۇش جاساقتاۋ تۋرالى قاۋلى قابىلداندى.
جيىن بارىسىندا 15 مۇشەدەن تۇراتىن ۋاقىتشا ۇكىمەت – الاشوردا سايلاندى. ۋاقىتشا ۇكىمەتتىڭ ورتالىعى رەتىندە سەمەي قالاسى بەلگىلەندى (كەيىن قالانىڭ اتى «الاش» دەپ تە اتالدى).
احمەت بايتۇرسىنۇلى سەزدىڭ تاريحي ماڭىزىنا توقتالىپ، بىلاي دەپ جازدى:
«5-13 جەلتوقساندا ورىنبور قالاسىندا وتكەن جالپىقىرعىز سەزى قىرعىز ولكەسىن اۆتونوميالى دەپ جاريالاپ، حالىق ميليتسياسىن قۇردى. وندا 15 مۇشەدەن تۇراتىن، بوكەيحانوۆ (بۇكىل قىرعىز حالقىنا تانىمال قوعام قايراتكەرى) باسشىلىعىنداعى الاشوردا اتتى ۋاقىتشا ۇكىمەتىن سايلادى. ۋاقىتشا ۇكىمەتتىڭ ۋاقىتشا ورنى رەتىندە سەمەي قالاسى كورسەتىلدى. الاشوردا اعزالارى ورىنبور قالاسىنداعى ءبىرىنشى وتىرىسىندا 1918 جىلى 10 قاڭتاردا سەمەي قالاسىندا جينالۋدى قاۋلى ەتتى».
بۇل مالىمەت سول كەزەڭنىڭ رەسمي ساياسي قادامدارىنىڭ كۋاسى رەتىندە تاريحي قۇجاتتاردا ساقتالعان.
