اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ سوربوننا–قازاقستان ينستيتۋتىنىڭ ديرەكتورى، زاڭ عىلىمدارىنىڭ دوكتورى اينۇر ءسابيتوۆا فرانتسيا پرەزيدەنتى ەممانۋەل ماكروننىڭ جارلىعى بويىنشا فرانتسيانىڭ «اكادەميالىق پالما» وردەنىمەن ماراپاتتالدى، دەپ حابارلايدى "ادىرنا".
اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ سوربوننا–قازاقستان ينستيتۋتىندا وتكەن سالتاناتتى شارادا جوعارى مەملەكەتتىك ناگرادانى قازاقستانداعى فرانتسيانىڭ توتەنشە جانە وكىلەتتى ەلشىسى سيلۆان گيو تابىستادى. وردەن اينۇر ءسابيتوۆانىڭ ءبىلىم بەرۋ، عىلىم جانە ادام قۇقىقتارىن قورعاۋ سالاسىنداعى ەلەۋلى ەڭبەگىن حالىقارالىق دەڭگەيدە مويىنداۋ رەتىندە ۇسىنىلدى.
راسىمگە اباي اتىنداعى قازۇپۋ رەكتورى بولات تىلەپ، قر ءسىم الماتىداعى وكىلدىگىنىڭ جەتەكشىسى جانيبەك ابدراشەۆ، فرانتسيا ەلشىلىگىنىڭ ديپلوماتتارى، قازاقستاندىق جانە فرانتسۋزدىق سەرىكتەس جوعارى وقۋ ورىندارىنىڭ پروفەسسور-وقىتۋشىلارى مەن ستۋدەنتتەرى قاتىستى. سونىمەن قاتار، قر عىلىم جانە جوعارى ءبىلىم ءمينيسترى ساياسات نۇربەك ارنايى بەينەقۇتتىقتاۋ جولدادى.
فرانتسيانىڭ «اكادەميالىق پالما» وردەنى – 1808 جىلى ناپولەون بوناپارت نەگىزىن قالاعان، ءبىلىم، عىلىم جانە مادەنيەت سالاسىنداعى ەرەكشە ەڭبەكتەر ءۇشىن بەرىلەتىن ەڭ كونە مەملەكەتتىك ماراپاتتاردىڭ ءبىرى. 1955 جىلدان باستاپ وردەنگە ۇلتتىق مارتەبە بەرىلىپ، پرەزيدەنت جارلىعىمەن تابىستالادى.
