قاراعاندى وبلىسىندا رەلس اۋىستىرىپ جاتقان ءتورت جۇمىسشىنى جۇك پويىزى باسىپ كەتتى. بۇل تۋرالى قتج ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
قايعىلى وقيعا بۇگىن، 10 جەلتوقساندا ساعات 17:15-تە شەشەنقارا – قاراجانعىل ارالىعىنداعى مويىنتى – شىعاناق ۋچاسكەسىندە بولعان. قتج مالىمەتىنشە، باعىت بويىمەن كەلە جاتقان جۇك پويىزى ءماشينيسى جولداعى تەمىرجولشىلاردى بايقاپ، شۇعىل تەجەۋ قولدانعان. ول ساتتە سارىشاعان ستانتسياسىنىڭ جول جوندەۋ بريگاداسى رەلستى اۋىستىرۋ بويىنشا جوسپارلى جۇمىستار جۇرگىزىپ جاتقان.
«بارلىق قاجەتتى شارالارعا قاراماستان، جازاتايىم وقيعانىڭ الدىن الۋ مۇمكىن بولمادى. ءتورت جۇمىسشى جاراقاتتان كوز جۇمدى. ورىن العان وقيعانىڭ بارلىق ءمان-جايلارى مەن سەبەپتەرىن انىقتاۋ ءۇشىن «قتج» ۇك» اق باسقارما توراعاسىنىڭ تاپسىرماسى بويىنشا «قتج – جۇك تاسىمالى» جشس جانە ماگيسترالدىق جەلى ديرەكتسياسى باسشىلارىنىڭ قۇرامىندا «قتج» ۇك» اق باس ينجەنەرى باستاعان ارنايى كوميسسيا قۇرىلدى. كوميسسيا تەكسەرىس جۇرگىزۋ ءۇشىن وقيعا ورنىنا جەدەل اتتاندى. «قازاقستان تەمىر جولى» ۇك» اق قازا تاپقانداردىڭ تۋىستارى مەن جاقىندارىنا كوڭىل ايتادى. قازا تاپقانداردىڭ وتباسىلارىنا قولداۋ كورسەتىلەدى»،- دەلىنگەن حابارلامادا.
