باسقارمانىڭ بۇرىنعى باسشىسى سوتقا تارتىلدى

فوتو جي-مەن جاسالعان

سقو-دا تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ بۇرىنعى باسشىسىنا قاتىستى سوت باستالدى، دەپ حابارلايدى “ادىرنا”.

بۇل تۋرالى وبلىستىق سوت حابارلادى.

ەربولات بەكشەنوۆ قىزمەتتىك وكىلەتتىگىن پايدالانىپ الاياقتىق جاسادى جانە پارا بەرۋگە ارانداتتى دەپ ايىپتالىپ وتىر.

ءىس بويىنشا بەكشەنوۆپەن بىرگە التى ورمان شارۋاشىلىعىنىڭ ديرەكتورى دا سوت الدىندا جاۋاپ بەرۋدە. ولاردىڭ بىرىنە پارا بەرۋگە كومەكتەستى، ال قالعاندارىنا پارا بەرۋگە وقتالدى دەگەن ايىپ تاعىلعان.

پروكۋراتۋرانىڭ مالىمەتىنشە، وقيعا 2025 جىلى مامانداندىرىلعان تابيعات قورعاۋ پروكۋراتۋراسى جۇرگىزگەن تەكسەرۋدەن كەيىن باستالعان. تەكسەرۋ بارىسىندا بەس ورمان شارۋاشىلىعىندا ەڭبەك زاڭناماسىنىڭ بۇزىلعانى انىقتالعان. اتاپ ايتقاندا، كەيبىر قىزمەتكەرلەرگە جۇمىسقا كەلمەگەن كۇندەرى ءۇشىن جالاقى ەسەپتەلگەن. زاڭبۇزۋشىلىقتاردى جويۋ تۋرالى نۇسقاما بەرىلىپ، نەگىزسىز تولەنگەن قاراجات بيۋدجەتكە قايتارىلعان.

تەرگەۋ نۇسقاسىنا سايكەس، وسىدان كەيىن باسقارمانىڭ سول كەزدەگى باسشىسى ورمان شارۋاشىلىقتارىنىڭ ديرەكتورلارىن تارتىپتىك كەڭەستە ماسەلە قايتا قارالىپ، قىزمەتتەرىنەن ايىرىلۋى مۇمكىن ەكەنىمەن سەندىرگەن. ماسەلەنى شەشۋگە كومەكتەسۋ ءۇشىن ارقايسىسىنان 100 مىڭ تەڭگەدەن جيناۋدى ۇيىمداستىرعان.

اقشانى جيناۋ جانە جەتكىزۋ مىندەتى ورمان شارۋاشىلىقتارىنىڭ ءبىرىنىڭ ديرەكتورىنا جۇكتەلگەن. ءتورت باسشى اقشانى 1 ناۋرىزدا بەرگەن. تاعى بىرەۋى بەكشەنوۆپەن سويلەسكەننەن كەيىن قاراجات تاپسىرعان. الايدا كەيىن باسقارما باسشىسىنىڭ ورىنباسارى ۇقك-ءنىڭ سقو بويىنشا دەپارتامەنتىنە جۇگىنىپ، جينالعان 500 مىڭ تەڭگەنى ءوز ەركىمەن تاپسىرعان.

سوت وتىرىسىندا بەكشەنوۆ پەن بەس ورمان شارۋاشىلىعىنىڭ باسشىسى كىنالارىن مويىنداعان. كەيبىر سوتتالۋشىلار پروكۋرورمەن پروتسەستىك كەلىسىم جاساسۋعا نيەتتى ەكەنىن بىلدىرگەن. ال تاعى ءبىر ديرەكتور تاعىلعان ايىپتى جوققا شىعارىپ وتىر. ونىڭ قورعاۋشىلارى سوتتالۋشىنىڭ پارا بەرۋشى ەمەس، باسشىلىق تاراپىنان قىسىم كورگەن ادام ەكەنىن ايتىپ، قىلمىستىق قۋدالاۋدى توقتاتۋدى سۇراعان.

ايتا كەتەيىك، ەربولات بەكشەنوۆ بۇل باسقارما باسشىسى قىزمەتىنە 2025 جىلدىڭ شىلدەسىندە تاعايىندالعان. بيىل ساۋىردە ۇلتتىق قاۋىپسىزدىك كوميتەتى وعان قاتىستى سوتقا دەيىنگى تەرگەۋ باستالعانىن راستاعان.