فوتو جەلىدەن الىنعان
اقش پرەزيدەنتى دونالد ترامپ، رەسەي پرەزيدەنتى ۆلاديمير پۋتين جانە قىتاي توراعاسى سي تسزينپين كەزدەسەدى، دەپ حابارلايدى “ادىرنا”.
ۇشجاقتى كەزدەسۋ 19 قاراشادا شەنچجەن قالاسىندا وتەتىن ازيا-تىنىق مۇحيتى ەكونوميكالىق ىنتىماقتاستىعى ءسامميتى اياسىندا وتەدى.
بۇل تۋرالى اق ءۇي وكىلى وليۆيا ۋەيلس حابارلادى.
اق ءۇي وكىلىنىڭ ايتۋىنشا، ءۇش ەل باسشىسىنىڭ العاشقى ۇشجاقتى كەزدەسۋىندەگى نەگىزگى تاقىرىپ يادرولىق قارۋدى باقىلاۋ جونىندەگى اۋقىمدى كەلىسىمدى ازىرلەۋ بولماق. الايدا اقش اكىمشىلىگىنىڭ جوعارى لاۋازىمدى وكىلى تاراپتار بۇل جولى ناقتى كەلىسىمگە قول قويادى دەپ كۇتپەيتىنىن جەتكىزدى. ونىڭ سوزىنشە، كەزدەسۋ كەلىسسوزدەردىڭ باستاپقى كەزەڭى رەتىندە قاراستىرىلادى.
The New York Post باسىلىمىنىڭ مالىمەتىنشە، تاراپتار اقش پەن يران اراسىنداعى سوعىستى جانە سولتۇستىك كورەيا توڭىرەگىندەگى جاعدايدى دا تالقىلاۋى مۇمكىن.
ال ۋكرايناداعى سوعىستى توقتاتۋ ماسەلەسى كۇن تارتىبىنە ەنگىزىلمەۋى ىقتيمال. اقش اكىمشىلىگىنىڭ وكىلى قىتاي بۇل ۇدەرىسكە تىكەلەي قاتىسپايتىنىن، سوندىقتان كەزدەسۋدە ۋكراينا ماسەلەسىن تالقىلاۋ جوسپارلانباعانىن ايتقان. سونداي-اق پۋتين مەن ترامپتىڭ جەكە كەزدەسۋى كوزدەلمەگەن.
بۇعان دەيىن The Wall Street Journal باسىلىمى ۆلاديمير ءپۋتيننىڭ ترامپ پەن سي تسزينپينگە اتەس ءسامميتى اياسىندا ۇشجاقتى كەزدەسۋ وتكىزۋدى ۇسىنعانىن جازعان ەدى.
ال گەرمانيا پرەزيدەنتى فرانك-ۆالتەر شتاينمايەر قىتاي باسشىسىمەن كەزدەسۋى كەزىندە ۋكراينا ماسەلەسىن تالقىلاعانىن ايتتى. ونىڭ سوزىنشە، سي تسزينپين بۇل قاقتىعىستى شەشۋ جونىندەگى كەلىسسوزدەرگە ەۋروپا ەلدەرى مىندەتتى تۇردە قاتىسۋى كەرەك ەكەنىن اتاپ وتكەن.
