قازاقستان پرەزيدەنتى قاسىم-جومارت توقاەا پەن اقش باسشىسى دونالد ترامپ اراسىندا 17 ملرد دوللاردان اساتىن كوممەرتسيالىق كەلىسىمدەر جاسالدى، دەپ حابارلايدى “ادىرنا”.
اق ۇيدەگى كەزدەسۋدە مەملەكەت باسشىسى ۆاشينگتونعا شاقىرعانى جانە قازاقستاندىق دەلەگاتسياعا كورسەتكەن قوناقجاي كوڭىلى ءۇشىن اقش پرەزيدەنتىنە ريزاشىلىق ءبىلدىردى.
قاسىم-جومارت توقاەۆ دونالد ترامپتىڭ پرەزيدەنتتىك لاۋازىمىنىڭ تاريحي سيپاتىنا توقتالىپ، ونىڭ باسشىلىعىمەن اقش الەمنىڭ جەتەكشى ەكونوميكالىق، ساياسي جانە تەحنولوگيالىق دەرجاۆاسى رەتىندەگى پوزيتسياسىن كۇشەيتىپ كەلە جاتقانىن اتاپ ءوتتى.
قازاقستان پرەزيدەنتىنىڭ ايتۋىنشا، امەريكا كوشباسشىسى جەر ءجۇزىنىڭ قاۋىپسىزدىگىن، تۇراقتىلىعى مەن وركەندەۋىن قامتاماسىز ەتۋدە شەشۋشى ءرول اتقارادى.
مەملەكەت باسشىسى قازاقستان اقش پرەزيدەنتىنىڭ بىتىمگەرلىك باستامالارىن تولىق قولدايتىنىن جەتكىزدى. سونىڭ ىشىندە كەلەشەكتە ورتا ءدالىزدى ودان ءارى دامىتۋعا ىقپال ەتەتىن "ترامپتىڭ حالىقارالىق بەيبىتشىلىك جانە وركەندەۋ جولىنا" (TRIPP) ەرەكشە نازار اۋداردى.
دونالد ترامپ اقش-تىڭ قازاقستانمەن كوپجوسپارلى كەڭەيتىلگەن ستراتەگيالىق سەرىكتەستىكتى دامىتۋعا نيەتتى ەكەنىن راستادى.
ساپار اياسىندا قازاقستان مەن قۇراما شتاتتارى اراسىندا جالپى سوماسى 17 ميلليارد دوللاردان اساتىن كوممەرتسيالىق كەلىسىمدەرگە قول قويىلدى.
اڭگىمەلەسۋ بارىسىندا ەكىجاقتى ىقپالداستىقتىڭ كەڭ كولەمدەگى ماسەلەلەرى جان-جاقتى تالقىلاندى، ءوزارا ءتيىمدى ىنتىماقتاستىقتىڭ پەرسپەكتيۆتى باعىتتارى ناقتىلاندى.
سونىمەن قاتار، پرەزيدەنتتەر حالىقارالىق كۇن ءتارتىبىنىڭ وزەكتى ماسەلەلەرى جونىندە پىكىر الماستى.
Kazinform اگەنتتىگىنىڭ حابارلاۋىنشا، وسى كەزدەسۋلەردىڭ بىرىندە اقش پرەزيدەنتى دونالد ترامپ قازاقستانمەن سەرىكتەستىكتىڭ بارلىق سالاسى ماڭىزدى ەكەنىن ايتىپ، قازاقستانعا كەلۋى مۇمكىن ەكەنىن دە ايتىپ قالعان.
– بۇل ابدەن مۇمكىن (قازاقستانعا ساپارمەن كەلۋ – رەد). بارلىق سالا وتە ماڭىزدى دەپ سانايمىن. ءبىر جىلدان كەيىن نە بولاتىنىن بىلمەيمىز. ءسىزدىڭ تابيعي رەسۋرسقا باي ەلىڭىز، سونداي-اق پاراساتتى پرەزيدەنتىڭىز بار، - دەپ جاۋاپ بەرگەن اقش پرەزيدەنتى دونالد ترامپ قازاقستاندىق باق ساۋالىنا.
پرەزيدەنت قاسىم-جومارت توقاەۆ اق ۇيدە تاريحي كەزدەسۋ ۇيىمداستىرعانى ءۇشىن اقش باسشىسىنا العىس ايتىپ، س5+1 فورماتىنداعى سامميت شىن مانىندە ورتالىق ازيا مەن قۇراما شتاتتار اراسىنداعى ىنتىماقتاستىقتىڭ جاڭا كەزەڭىنە جول اشقانىنا نازار اۋداردى.
پرەزيدەنت اقش-قا بارا سالا العاشقى كەلىسىمدى اسا ماڭىزدى مينەرالدار سالاسىنان باستادى. قازاقستان ونەركاسىپ جانە قۇرىلىس ءمينيسترى ەرسايىن ناعاسپاەۆ پەن اقش ساۋدا ءمينيسترى گوۆارد لاتنيك اسا ماڭىزدى مينەرالدار سالاسىنداعى ىنتىماقتاستىق تۋرالى مەموراندۋمعا قول قويعانى بۇدان الدىن حابارلانعان.
كەلىسسوزدە گەوساياسي ماسەلەلەردىڭ ماڭىزدىسى رەتىندە مىنانى ايتۋعا بولادى. قازاقستان باسشىسى امەريكاداعى كەزدەسۋلەردىڭ بىرىندە يبراھيم كەلىسىمىنە قوسىلاتىنىن مالىمدەگەن.
يبراھيم كەلىسىمى دەگەن – تاياۋ شىعىستاعى كيكىلجىڭدى بىرجاقتى ەتۋ ءۇشىن اقش 2020 جىلى ازىرلەگەن كەلىسىمدى اتايدى. ونىڭ «اۆراام كەلىسىمى» دەگەن سىڭار اتاۋى دا بار. بۇل – يزرايل مەن اراب ەلدەرى اراسىنداعى بەيبىت قاتىناستى نىعايتۋعا ارنالعان كەلىسسوزدەر. كەلىسىم 2020 جىلى يزرايل، بىرىككەن اراب امىرلىكتەرى، باحرەين جانە ماروككو اراسىندا جاسالعان-دى. كەيىن كەلىسىمگە ەگيپەت پەن سۋدان كىردى. قازىر اق ءۇي اكىمشىلىگى قازاقستان مەن ازەربايجاننىڭ دا وسى كەلىسىمگە قوسىلۋىنا مۇددەلى.
