Qazaqstan Prezidentı Qasym-Jomart Toqaea pen AQŞ basşysy Donald Tramp arasynda 17 mlrd dollardan asatyn kommersiialyq kelısımder jasaldy, dep habarlaidy “Adyrna”.
Aq üidegı kezdesude Memleket basşysy Vaşingtonǧa şaqyrǧany jäne qazaqstandyq delegasiiaǧa körsetken qonaqjai köŋılı üşın AQŞ Prezidentıne rizaşylyq bıldırdı.
Qasym-Jomart Toqaev Donald Tramptyŋ prezidenttık lauazymynyŋ tarihi sipatyna toqtalyp, onyŋ basşylyǧymen AQŞ älemnıŋ jetekşı ekonomikalyq, saiasi jäne tehnologiialyq derjavasy retındegı pozisiiasyn küşeitıp kele jatqanyn atap öttı.
Qazaqstan Prezidentınıŋ aituynşa, Amerika köşbasşysy jer jüzınıŋ qauıpsızdıgın, tūraqtylyǧy men örkendeuın qamtamasyz etude şeşuşı röl atqarady.
Memleket basşysy Qazaqstan AQŞ Prezidentınıŋ bıtımgerlık bastamalaryn tolyq qoldaitynyn jetkızdı. Sonyŋ ışınde keleşekte Orta dälızdı odan ärı damytuǧa yqpal etetın "Tramptyŋ halyqaralyq beibıtşılık jäne örkendeu jolyna" (TRIPP) erekşe nazar audardy.
Donald Tramp AQŞ-tyŋ Qazaqstanmen köpjosparly keŋeitılgen strategiialyq serıktestıktı damytuǧa niettı ekenın rastady.
Sapar aiasynda Qazaqstan men Qūrama Ştattary arasynda jalpy somasy 17 milliard dollardan asatyn kommersiialyq kelısımderge qol qoiyldy.
Äŋgımelesu barysynda ekıjaqty yqpaldastyqtyŋ keŋ kölemdegı mäselelerı jan-jaqty talqylandy, özara tiımdı yntymaqtastyqtyŋ perspektivtı baǧyttary naqtylandy.
Sonymen qatar, prezidentter halyqaralyq kün tärtıbınıŋ özektı mäselelerı jönınde pıkır almasty.
Kazinform agenttıgınıŋ habarlauynşa, osy kezdesulerdıŋ bırınde AQŞ prezidentı Donald Tramp Qazaqstanmen serıktestıktıŋ barlyq salasy maŋyzdy ekenın aityp, Qazaqstanǧa keluı mümkın ekenın de aityp qalǧan.
– Būl äbden mümkın (Qazaqstanǧa saparmen kelu – red). Barlyq sala öte maŋyzdy dep sanaimyn. Bır jyldan keiın ne bolatynyn bılmeimız. Sızdıŋ tabiǧi resursqa bai elıŋız, sondai-aq parasatty Prezidentıŋız bar, - dep jauap bergen AQŞ prezidentı Donald Tramp qazaqstandyq BAQ saualyna.
Prezident Qasym-Jomart Toqaev Aq üide tarihi kezdesu ūiymdastyrǧany üşın AQŞ basşysyna alǧys aityp, S5+1 formatyndaǧy sammit şyn mänınde Ortalyq Aziia men Qūrama Ştattar arasyndaǧy yntymaqtastyqtyŋ jaŋa kezeŋıne jol aşqanyna nazar audardy.
Prezident AQŞ-qa bara sala alǧaşqy kelısımdı asa maŋyzdy mineraldar salasynan bastady. Qazaqstan Önerkäsıp jäne qūrylys ministrı Ersaiyn Naǧaspaev pen AQŞ Sauda ministrı Govard Latnik asa maŋyzdy mineraldar salasyndaǧy yntymaqtastyq turaly memorandumǧa qol qoiǧany būdan aldyn habarlanǧan.
Kelıssözde geosaiasi mäselelerdıŋ maŋyzdysy retınde mynany aituǧa bolady. Qazaqstan basşysy Amerikadaǧy kezdesulerdıŋ bırınde İbrahim kelısımıne qosylatynyn mälımdegen.
İbrahim kelısımı degen – Taiau Şyǧystaǧy kikıljıŋdı bırjaqty etu üşın AQŞ 2020 jyly äzırlegen kelısımdı ataidy. Onyŋ «Avraam kelısımı» degen syŋar atauy da bar. Būl – İzrail men arab elderı arasyndaǧy beibıt qatynasty nyǧaituǧa arnalǧan kelıssözder. Kelısım 2020 jyly İzrail, Bırıkken Arab Ämırlıkterı, Bahrein jäne Marokko arasynda jasalǧan-dy. Keiın kelısımge Egipet pen Sudan kırdı. Qazır Aq üi äkımşılıgı Qazaqstan men Äzerbaijannyŋ da osy kelısımge qosyluyna müddelı.
