«Memleketke opasyzdyq jasady» degen aıyppen 10 jylǵa sottalǵan qytaıtanýshy Konstantın Syroejkın Qasym-Jomart Toqaevtan raqymshylyq jasaýdy suraıdy. Bul týraly ol Zona.kz ınternet basylymynda jarııalanǵan maqalasynda aıtty, dep habarlaıdy «Adyrna» tilshisi.
Ǵalym Qazaqstanda ádildik izdeý úshin barlyq múmkindigin sarp etkenin málimdep, endigi úmiti prezıdentte ekenin jetkizdi.
Túrmede otyrǵan bes jyl ishinde Syroejkın óz isine qatysy bar sýdıalar men prokýrorlardyń ústinen ondaǵan shaǵym jazǵan bolatyn. Alaıda olardan eshqandaı nátıje bolmady.
«Qasym-Jomart Toqaevpen birneshe ret «habarlasýǵa» árekettendim, biraq oǵan qol jetkize almadym»,—dedi ol.
Buǵan deıin sınolog tergeýshiler ashyq derekkózder negizinde daıyndalǵan materıaldardy onyń «qylmystyq áreketiniń» dáleli retinde qarastyratynyn habarlaǵan edi. Aıtýynsha, olarda eshqandaı ınsaıderlik aqparat bolmaǵan jáne Qazaqstannyń ulttyq múddelerine nuqsan keltirilmegen.
Eske salaıyq, 2019 jyly Konstantın Syroejkın Qylmystyq kodekstiń 175-babynyń 1-bólimi «Memleketke opasyzdyq jasaý» boıynsha kináli dep tanylǵan edi. Ol — qytaıtanýshy ǵalym, kóptegen kitaptyń, sondaı-aq orys, aǵylshyn jáne qytaı tilderindegi myńnan asa maqalanyń avtory. Zertteýshi uzaq jyldar boıy Qazaqstan Respýblıkasy Prezıdenti janyndaǵy Qazaqstan strategııalyq zertteý ınstıtýtynyń bas ǵylymı qyzmetkeri jumysyn atqardy.
