«مەملەكەتكە وپاسىزدىق جاسادى» دەگەن ايىپپەن 10 جىلعا سوتتالعان قىتايتانۋشى كونستانتين سىروەجكين قاسىم-جومارت توقاەۆتان راقىمشىلىق جاساۋدى سۇرايدى. بۇل تۋرالى ول Zona.kz ينتەرنەت باسىلىمىندا جاريالانعان ماقالاسىندا ايتتى، دەپ حابارلايدى «ادىرنا» ءتىلشىسى.
عالىم قازاقستاندا ادىلدىك ىزدەۋ ءۇشىن بارلىق مۇمكىندىگىن سارپ ەتكەنىن مالىمدەپ، ەندىگى ءۇمىتى پرەزيدەنتتە ەكەنىن جەتكىزدى.
تۇرمەدە وتىرعان بەس جىل ىشىندە سىروەجكين ءوز ىسىنە قاتىسى بار سۋديالار مەن پروكۋرورلاردىڭ ۇستىنەن ونداعان شاعىم جازعان بولاتىن. الايدا ولاردان ەشقانداي ناتيجە بولمادى.
«قاسىم-جومارت توقاەۆپەن بىرنەشە رەت «حابارلاسۋعا» ارەكەتتەندىم، بىراق وعان قول جەتكىزە المادىم»،—دەدى ول.
بۇعان دەيىن سينولوگ تەرگەۋشىلەر اشىق دەرەككوزدەر نەگىزىندە دايىندالعان ماتەريالداردى ونىڭ «قىلمىستىق ارەكەتىنىڭ» دالەلى رەتىندە قاراستىراتىنىن حابارلاعان ەدى. ايتۋىنشا، ولاردا ەشقانداي ينسايدەرلىك اقپارات بولماعان جانە قازاقستاننىڭ ۇلتتىق مۇددەلەرىنە نۇقسان كەلتىرىلمەگەن.
ەسكە سالايىق، 2019 جىلى كونستانتين سىروەجكين قىلمىستىق كودەكستىڭ 175-بابىنىڭ 1-ءبولىمى «مەملەكەتكە وپاسىزدىق جاساۋ» بويىنشا كىنالى دەپ تانىلعان ەدى. ول — قىتايتانۋشى عالىم، كوپتەگەن كىتاپتىڭ، سونداي-اق ورىس، اعىلشىن جانە قىتاي تىلدەرىندەگى مىڭنان اسا ماقالانىڭ اۆتورى. زەرتتەۋشى ۇزاق جىلدار بويى قازاقستان رەسپۋبليكاسى پرەزيدەنتى جانىنداعى قازاقستان ستراتەگيالىق زەرتتەۋ ينستيتۋتىنىڭ باس عىلىمي قىزمەتكەرى جۇمىسىن اتقاردى.
