مەملەكەت باسشىسى قاسىم-جومارت توقاەۆ توگو رەسپۋبليكاسىنىڭ پرەزيدەنتى فور گناسسينگبەمەن تەلەفون ارقىلى سويلەستى. بۇل تۋرالى اقوردا رەسمي سايتىندا جاريلاندى، دەپ حابارلايدى «ادىرنا» ۇلتتىق پورتالى.
پرەزيدەنتتىڭ ءباسپاسوز قىزمەتىنىڭ مالىمەتىنشە، مەملەكەت باسشىسى افريكاداعى ساياسي جانە ەكونوميكالىق جاڭعىرۋ ۇدەرىسىن ەرەكشە ىقىلاسپەن باقىلاپ وتىرعانىن، قازاقستاننىڭ اتالعان قۇرلىقتاعى ەلدەرمەن قارىم-قاتىناستى كەڭەيتۋگە نيەتتى ەكەنىن ايتتى.
كەلەسى جىلى قازاقستان مەن توگو اراسىنداعى ديپلوماتيالىق قاتىناستاردىڭ ورناعانىنا 10 جىل تولادى. وسىعان بايلانىستى مەملەكەت باسشىلارى ەكىجاقتى بايلانىستاردى نىعايتۋعا ءوزارا بەيىلدى ەكەنىن راستادى.
اڭگىمەلەسۋ بارىسىندا پرەزيدەنتتەر ساۋدا، ينۆەستيتسيا، كولىك، لوگيستيكا جانە اۋىل شارۋاشىلىعى سالالارىنداعى ىنتىماقتاستىقتى تەرەڭدەتۋ پەرسپەكتيۆالارىن، سونداي-اق حالىقارالىق ۇيىمدار اياسىنداعى ءوزارا ىقپالداستىق ماسەلەلەرىن تالقىلادى.
«ادىرنا» ۇلتتىق پورتالى
