يراننىڭ جاڭا جوعارعى كوشباسشىسى مودجتابا حامەنەي حالىققا العاشقى رەسمي ۇندەۋىن جاريالادى. ونىڭ مالىمدەمەسى تەلەديدار ارقىلى وقىلىپ، بۇقارالىق اقپارات قۇرالدارى ارقىلى تارادى. ۇندەۋ بارىسىندا كوشباسشى كادرعا شىققان جوق، دەپ حابارلايدى “ادىرنا” ۇلتتىق پورتالى Tasnim News Agency اگەنتتىگىنە سىلتەمە جاساپ.
العاشقى سوزىندە حامەنەي ايماقتا ورنالاسقان اقش-تىڭ اسكەري بازالارى تۋرالى قاتاڭ مالىمدەمە جاسادى. ونىڭ ايتۋىنشا، تاياۋ شىعىستاعى بارلىق امەريكالىق اسكەري نىساندار دەرەۋ جابىلۋى ءتيىس. ايتپەسە، ولار يران تاراپىنان سوققى جاسالۋى مۇمكىن نىسانالارعا اينالاتىنىن ەسكەرتتى.
سونىمەن قاتار ول يزرايل مەن اقش تاراپىنان جاسالعان شابۋىلدار سالدارىنان قازا تاپقان بەيبىت تۇرعىندار ءۇشىن يران كەك قايتاراتىنىن مالىمدەدى. حامەنەي ەگەر قاقتىعىس توقتاماسا، تەگەران جاڭا باعىتتاردا اسكەري وپەراتسيالار جۇرگىزۋگە دايىن ەكەنىن ايتتى.
ۇندەۋ بارىسىندا يران باسشىسى جەكە وتباسىنا قاتىستى قايعىلى جاعدايدى دا راستادى. ول جۇبايى مەن اپكەسىنىڭ قازا تاپقانىن حابارلادى.
مودجتابا حامەنەي ءوز سوزىندە الەمدىك مۇناي تاسىمالى وتەتىن ماڭىزدى تەڭىز جولدارىنىڭ ءبىرى – ورمۋز بۇعازى تۋرالى دا ايتتى. ونىڭ پىكىرىنشە، بۇل ايماق يران ءۇشىن ستراتەگيالىق ماڭىزى زور قۇرال بولىپ سانالادى.
«ورمۋز بۇعازىن جابۋ مەحانيزمى قاجەت بولعان جاعدايدا مىندەتتى تۇردە قولدانىلۋى ءتيىس»، – دەدى ول.
حامەنەي قارسى تاراپتىڭ كەيبىر باعىتتاردا تاجىريبەسى از ءارى وسال تۇستارى بار ەكەنىن اتاپ ءوتتى. ەگەر اسكەري قاقتىعىس جالعاساتىن بولسا، يران بۇل تەتىكتى ىسكە قوسۋى مۇمكىن ەكەنىن ەسكەرتتى.
يران باسشىسى اقش-تان اسكەري شابۋىلدار سالدارىنان كەلگەن شىعىن ءۇشىن وتەماقى تالاپ ەتىلەتىنىن دە مالىمدەدى. ونىڭ سوزىنشە، ەگەر ۆاشينگتون بۇل تالاپتان باس تارتسا، تەگەران «قاجەت دەپ تاپقان كولەمدە» وتەمدى ءوز تاسىلىمەن الۋى مۇمكىن.
سونىمەن قاتار، ەگەر اكتيۆتەردى تىكەلەي الۋ مۇمكىن بولماسا، يران قارسى تاراپتىڭ مۇلكىنە «ايناداعىداي جاۋاپ» بەرۋ قۇقىعىن ساقتايتىنىن ايتتى.
ايتا كەتسەك، بۇعان دەيىن يراننىڭ قازاقستانداعى ەلشىسى ءالي اكبار دجوۋكار يراننىڭ يسلام رەۆوليۋتسياسى جەتەكشىسى مودجتابا حامەنەي سايلانعاننان كەيىن ونىڭ ءالى كوپشىلىك الدىنا نەگە شىقپاعانى تۋرالى پىكىر بىلدىرگەن بولاتىن.
ەلشى مودجتابا حامەنەيدىڭ العان جاراقاتى اسا اۋىر ەمەس ەكەنىن جانە بۇل جاعدايعا بايلانىستى ءتۇرلى الىپ-قاشپا اڭگىمەلەردىڭ تارالۋى مۇمكىن ەكەنىن اتاپ ءوتتى.
