اقش مەملەكەتتىك دەپارتامەنتى يراننىڭ ازەربايجان اۋماعىنا جاساعان ۇشقىشسىز ۇشۋ اپپاراتتارى ارقىلى شابۋىلىن قاتاڭ ايىپتادى. بۇل تۋرالى رەسمي مالىمدەمەدە ايتىلدى، دەپ حابارلايدى “ادىرنا” پورتالى Report اگەنتتىگىنە سىلتەپ.
مالىمەتكە سايكەس، 5 ناۋرىز كۇنى يران دروندارى ازەربايجاننىڭ قۇرامىنداعى ناحچىۆانداعى بىرقاتار نىساندارعا سوققى جاساعان. شابۋىلدىڭ نەگىزگى نىساندارىنىڭ ءبىرى Nakhchivan International Airport مەن بالالار مەكتەبى بولعان. سونىڭ سالدارىنان بەيبىت تۇرعىندار جاراقات الىپ، ازاماتتىق ينفراقۇرىلىمعا ايتارلىقتاي زيان كەلگەن.
اقش مەملەكەتتىك دەپارتامەنتىنىڭ مالىمدەۋىنشە، بۇل ارەكەت – ازەربايجان مەملەكەتىنىڭ ەگەمەندىگىن ورەسكەل بۇزۋ. سونىمەن قاتار ۆاشينگتون مۇنداي شابۋىلداردى ايماقتاعى جاعدايدى قاجەتسىز ۋشىقتىراتىن ارەكەت دەپ باعالادى.
اقش بيلىگى مۇنداي قاۋىپ-قاتەر جاعدايىندا ازەربايجانمەن تولىق ىنتىماقتاستىقتا ەكەنىن ءبىلدىردى. رەسمي ۆاشينگتون ايماقتاعى سەرىكتەس مەملەكەتتەردىڭ اۋماعىنا جاسالعان شابۋىلداردى قابىلداۋعا بولمايتىنىن اتاپ ءوتتى.
مالىمدەمەدە سونداي-اق امەريكا قۇراما شتاتتارى ءوز سەرىكتەستەرىنىڭ قاۋىپسىزدىگىن قامتاماسىز ەتۋ ءۇشىن قاجەتتى قولداۋ كورسەتۋگە دايىن ەكەنى ايتىلدى.
