مەملەكەت باسشىسىنىڭ تاپسىرماسى بويىنشا 2026 جىلدان باستاپ ەلىمىزدىڭ 217 مەكتەبىندە دزيۋدو سەكتسيالىق فورماتتا ەنگىزىلەدى. بۇل تۋرالى پرەزيدەنت كومەكشىسى رۋسلان جەلدىباي مالىمدەدى، دەپ حابارلايدى “ادىرنا”.
“حالىقارالىق دزيۋدو فەدەراتسياسىنىڭ وقۋشىلارعا ارنالعان ارنايى جەڭىلدەتىلگەن باعدارلاماسىن بىزگە تولىق بەرىپ وتىر. وسى شەشىم ءۇشىن IJF باسشىلىعىنا العىس بىلدىرەمىن.
جالپى، الداعى ءۇش جىلدا 1 مىڭ مەكتەپكە ەنگىزۋ جوسپارلانىپ وتىر. باسىمدىق اۋىل مەكتەپتەرىنە بەرىلەدى. باعدارلاما اياسىندا باپكەرلەردى دايىنداۋعا دا كوڭىل بولىنەدى.
دزيۋدو - كەرەمەت سپورت. مۇندا دەنساۋلىقپەن قاتار، تاربيەلىك ءمانى جوعارى.
سابىرلى، ءتوزىمدى بولۋ، تارتىپكە باعىنۋ، قارسىلاستى قۇرمەتتەۋ، مىنەزدىڭ قالىپتاسۋىنا اسەر ەتەدى. سونداي-اق قاۋىپسىزدىك جاعىنان دا پايدالى. ۇلدار دا، قىزدار دا ەركىن اينالىسا الادى، اسا شىعىندى تالاپ ەتپەيدى”، - دەپ جازدى ول.
