بۇگىن، 17 جەلتوقسان كۇنى ۇكىمەت وتىرىسىندا 2025 جىلدىڭ 11 ايىنداعى الەۋمەتتىك-ەكونوميكالىق دامۋ قورىتىندىلارى قارالدى، دەپ حابارلايدى «ادىرنا» ءتىلشىسى.
ۇەم دەرەكتەرى بويىنشا، باستى كورسەتكىش – ءجىو-ءنىڭ ءوسىمى، ول 6,4%-عا جەتكەن.
نەگىزگى درايۆەرلەر ءوسىمى 7,3%-دان 7,4%-عا دەيىن جەدەلدەگەن ونەركاسىپ پەن 6,1%-عا ىلگەرىلەگەن اۋىل شارۋاشىلىعى بولدى. تۇراقتى دامۋدى ناقتى ەكونوميكانىڭ باسقا سەكتورلارى دا كورسەتىپ وتىر. اتاپ ايتقاندا، كولىك سالاسى 20,3%-عا، قۇرىلىس 14,7%-عا ءوستى، ال ساۋدا 8,8%-عا ارتتى.
«ەكونوميكا سىرتقى جاعدايلارعا بەيىمدەلىپ، تۇراقتى دامۋ جولىنا ءتۇستى. ءبىز بازالىق سالالاردا جەدەلدەۋ بارىن كورىپ وتىرمىز، بۇل الەۋمەتتىك مىندەتتەمەلەردى ورىنداۋ جانە اۋقىمدى ينفراقۇرىلىمدىق جوبالاردى جۇزەگە اسىرۋ ءۇشىن بەرىك نەگىز قالايدى»،- دەدى پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين.
ينۆەستيتسيالاردىڭ ەڭ كوپ ءوسۋءى اقمولا, پاۆلودار, جامبىل, الماتى جانە اقتوبە وبلىستارىندا بايقالعان، ال تومەندەۋى اتىراۋ جانە قاراعاندى وبلىستارىندا تىركەلگەن.
ءمينيستردىڭ ايتۋىنشا، قاڭتار-قازاندا سىرتقى ساۋدا اينالىمى116,3 ملرد دوللاردى قۇراعان.
"تاۋارلار ەكسپورتى 64,6 ملرد دوللاردى, ونىڭ ىشىندە وڭدەلگەن تاۋارلاردىڭ ەكسپورتى 23,3 ملرد دوللاردى قۇرادى. تاۋارلاردىڭ يمپورتى – 51,7 ملرد دوللار. 12,9 ملرد دوللاردان اسا كولەمدە وڭ ساۋدا بالانسى ساقتالادى",- دەدى ول.
