استانا مەن الماتىداعى ەكى جوعارى وقۋ ورنىنىڭ ستۋدەنتتەرىنەن تۋبەركۋليوز انىقتالدى. بۇل اقپاراتتى دەنساۋلىق ساقتاۋ مينيسترلىگى راستادى، دەپ حابارلايدى "ادىرنا".
Tengrinews.kz رەداكتسياسىنا وقىرماندار حابارلاسىپ، الماتىداعى قۇرمانعازى اتىنداعى قازاق ۇلتتىق كونسەرۆاتورياسىنىڭ ءبىر ستۋدەنتىنەن تۋبەركۋليوز انىقتالعانىن ايتقان. ولاردىڭ مالىمەتىنشە، ستۋدەنت شامامەن ەكى اپتادان بەرى اۋىرىپ جۇرگەن، الايدا وقۋ ورنى ادەتتەگى رەجيمدە جۇمىسىن جالعاستىرىپ، كارانتين ەنگىزىلمەگەن.
سونداي-اق وقىرماندار استاناداعى ل.ن. گۋميليوۆ اتىنداعى ەۋرازيا ۇلتتىق ۋنيۆەرسيتەتىنىڭ ءبىر ستۋدەنتىنەن دە تۋبەركۋليوزدىڭ اشىق ءتۇرى تابىلعانىن حابارلاعان.
مينيسترلىك مالىمەتىنشە، تۋبەركۋليوز تەك ەكى ستۋدەنتتەن – ءار ۋنيۆەرسيتەتتەن ءبىر-ءبىر ادامنان انىقتالعان.
"قۇرمانعازى اتىنداعى كونسەرۆاتوريا مەن گۋميليوۆ اتىنداعى ەۇۋ ستۋدەنتتەرىندە تىركەلگەن تۋبەركۋليوز جاعدايلارى بويىنشا ولاردىڭ وقۋ ورنىنداعى جانە وتباسىنداعى بارلىق بايلانىستا بولعان ادامدار تەكسەرىلدى. قازىرگى ۋاقىتتا تۋبەركۋليوزدىڭ جاڭا جاعدايلارى انىقتالعان جوق", – دەلىنگەن رەسمي جاۋاپتا.
ۆەدومستۆو مالىمەتىنشە، ەكى ستۋدەنت تە بەكىتىلگەن ستاندارتتى حاتتاما بويىنشا ەم قابىلداپ جاتىر، جاعدايلارى قاناعاتتانارلىق. ولار وقۋ ورىندارىنا بارمايدى جانە اينالاسىنداعىلار ءۇشىن ەپيدەميولوگيالىق قاۋىپ توندىرمەيدى، ەمدى امبۋلاتورلىق جاعدايدا الىپ جاتىر.
مينيسترلىك وكىلدەرى تۋبەركۋليوز كارانتين ەنگىزىلەتىن اۋرۋ تىزىمىنە كىرمەيتىنىن ءتۇسىندىردى. سوندىقتان جوعارى وقۋ ورىندارىندا شەكتەۋ شارالارى قولدانىلمايدى جانە وقۋ پروتسەسىنىڭ فورماتىن وزگەرتۋ قاجەت ەمەس.
ايتا كەتەيىك، 2025 جىلدىڭ باسىنان بەرى قازاقستان بويىنشا جوعارى جانە ورتا وقۋ ورىندارىنىڭ 280 ستۋدەنتىنەن تۋبەركۋليوز انىقتالعان.
