كىتاپحانا ءداستۇرلى كىتاپ مادەنيەتى مەن زاماناۋي تسيفرلىق تەحنولوگيالاردى ءوزارا ۇيلەستىرە وتىرىپ، قالا تۇرعىندارى ءۇشىن قولجەتىمدى، اشىق ءارى كوپفۋنكتسيونالدى مادەني جانە ءبىلىم بەرۋ الاڭى رەتىندە جوبالانعان. جاڭا فورماتتاعى بۇل كەڭىستىك ءبىلىم الۋعا، شىعارماشىلىقپەن اينالىسۋعا، زياتكەرلىك الەۋەتتى دامىتۋعا جانە مادەني قارىم-قاتىناستى نىعايتۋعا باعىتتالعان.
جاڭا كىتاپحانانىڭ سالتاناتتى اشىلۋ راسىمىنە الماتى قالاسىنىڭ تۇرعىندارىمەن قاتار قالا باسشىلىعىنىڭ وكىلدەرى، عىلىم مەن مادەنيەت سالاسىنىڭ كورنەكتى وكىلدەرى، بەلگىلى عالىمدار، جازۋشىلار، ادەبيەتتانۋشىلار جانە قوعام قايراتكەرلەرى قاتىستى. ءىس-شارا بارىسىندا كىتاپحانانىڭ نەگىزگى باعىتتارى مەن الداعى دامۋ جوسپارلارى تانىستىرىلىپ، ونىڭ قالا ومىرىندەگى ءرولى جان-جاقتى اتاپ ءوتىلدى.
كىتاپحانانىڭ باي كىتاپ قورى مەن زاماناۋي ماتەريالدىق-تەحنيكالىق بازاسى ءارتۇرلى جاس ساناتىنداعى جانە قىزىعۋشىلىعى الۋان ءتۇرلى وقىرمانداردىڭ سۇرانىسىن تولىقتاي قاناعاتتاندىرۋعا مۇمكىندىك بەرەدى. مۇندا كومپيۋتەرلىك زال، جەكە جۇمىس ىستەۋگە ارنالعان تىنىش وقۋ ايماقتارى، سونداي-اق توپتىق كەزدەسۋلەرگە، پىكىر الماسۋعا جانە شىعارماشىلىق جوبالاردى جۇزەگە اسىرۋعا ارنالعان ارنايى كەڭىستىكتەر جابدىقتالعان. بارلىق ايماقتار وقىرمانداردىڭ ىڭعايلى ءارى ءتيىمدى جۇمىس ىستەۋىنە لايىقتالىپ جاسالعان.
سونىمەن قاتار، كىتاپحانادا كەلۋشىلەردىڭ ۋاقىتىن مازمۇندى ءارى جايلى وتكىزۋى ءۇشىن بارلىق جاعداي قاراستىرىلعان. ەرەكشە قاجەتتىلىگى بار ازاماتتارعا ارنالعان ارنايى بەيىمدەلگەن جۇمىس ورىندارى ورناتىلىپ، ينكليۋزيۆتى ورتا قالىپتاستىرىلعان. كورۋ قابىلەتى تومەن وقىرماندار ءۇشىن ءىرى قارىپتەگى، سونداي-اق ارنايى فورماتتاعى ادەبيەتتەر قورى جيناقتالىپ، قولجەتىمدىلىكتى ارتتىرۋعا باعىتتالعان جۇيەلى جۇمىستار جۇرگىزىلگەن.
ءىس-شارا بارىسىندا ءسوز سويلەگەن الماتى قالاسى اكىمىنىڭ ورىنباسارى ابزال نۇكەنوۆ جاڭا كىتاپحانانىڭ قالانىڭ مادەني جانە رۋحاني ومىرىندەگى ماڭىزىن ەرەكشە اتاپ ءوتتى.
«كىتاپحانا – قالانىڭ رۋحاني تىنىسىن ايقىندايتىن ورىن. ءبىز ءوز تاراپىمىزدان قالا تۇرعىندارىنا جاڭا ءبىلىم نارىمەن سۋسىنداۋعا، جان-جاقتى دامۋىنا جاعداي جاساپ وتىرمىز. بۇل كىتاپحانا تەك كىتاپ وقيتىن ورىن ەمەس، وي مەن يدەيا توعىساتىن زاماناۋي مادەني ورتالىق»، – دەدى ابزال نۇكەنۇلى.
كىتاپحانانىڭ ەرەكشە جوبالارىنىڭ ءبىرى – بالالار مەن جاسوسپىرىمدەردىڭ كىتاپ وقۋعا دەگەن قىزىعۋشىلىعىن ارتتىرۋعا باعىتتالعان «وقى – وينا!» جوباسى. اتالعان جوبا اياسىندا بالالار ايماعىندا PlayStation 5 ورناتىلىپ، ويىن مەن وقۋدى ۇشتاستىراتىن تىڭ فورمات ۇسىنىلعان. بۇل باستاما بالالاردىڭ كىتاپحانا كەڭىستىگىنە دەگەن قىزىعۋشىلىعىن ارتتىرىپ، ولاردىڭ كىتاپقا جاقىندىعىن ەرتە جاستان قالىپتاستىرۋعا جانە وقۋ مادەنيەتىن دامىتۋعا ىقپال ەتەدى.
سالتاناتتى جيىندا ءسوز العان ادەبيەتتانۋشى، قازاقستاننىڭ ەڭبەك سىڭىرگەن قايراتكەرى قانسەيىت ابدەزۇلى دا جاڭا كىتاپحانانىڭ تاربيەلىك جانە مادەني ماڭىزىنا توقتالدى.
«كىتاپحانا – بولاشاق وقىرماندى تاربيەلەيتىن ماڭىزدى مادەني ورتا. مۇنداي زاماناۋي ءارى تولىق قولجەتىمدى كەڭىستىكتىڭ اشىلۋى جاستاردى كىتاپقا جاقىنداتىپ، وقىرمان مادەنيەتىن جاڭا دەڭگەيگە كوتەرەدى»، – دەدى قانسەيىت ابدەزۇلى.
جالپى العاندا، بۇل باستاما الماتى قالاسىنىڭ مادەني ينفراقۇرىلىمىن ودان ءارى دامىتۋعا، وقىرمان مادەنيەتىن جاڭعىرتۋعا، سونداي-اق ۇلتتىق رۋحاني قۇندىلىقتاردى نىعايتۋعا باعىتتالعان ماڭىزدى قادام رەتىندە باعالانىپ وتىر. جاڭا كىتاپحانا قالا تۇرعىندارى ءۇشىن تەك ءبىلىم الۋ ورنى عانا ەمەس، سونىمەن قاتار شىعارماشىلىق پەن زياتكەرلىك دامۋعا جول اشاتىن ورتا بولماق.
ايتا كەتەيىك، قالالىق جاڭا كىتاپحانا روزىباكيەۆ كوشەسى، 247-ءۇي، 7-بلوك مەكەنجايىندا ورنالاسقان. ول قالا تۇرعىندارى مەن قوناقتارى ءۇشىن كۇندەلىكتى ساعات 08:30-دان 20:00-گە دەيىن، دەمالىسسىز قىزمەت كورسەتەدى.
