الماتى قالالىق پوليتسيا دەپارتامەنتى قازتاگ اقپارات اگەنتتىگىنىڭ باس رەداكتورى ءامىر قاسەنوۆتىڭ ۇستالۋىنا بايلانىستى تۇسىنىكتەمە بەردى، دەپ حابارلايدى «ادىرنا» ءتىلشىسى.
پد مالىمەتىنشە، رەداكتسيا قىزمەتكەرلەرىنە قاتىستى سوتقا دەيىنگى تەرگەۋ جەكەمەنشىك كومپانيا وكىلىنىڭ جازباشا ارىزى نەگىزىندە باستالعان. ارىزدا ولاردىڭ ىسكەرلىك مۇددەلەرى مەن بەدەلىنە ەلەۋلى زيان كەلتىرگەن، كورىنەۋ جالعان اقپاراتتى بىرنەشە رەت تاراتقانى ايتىلعان.
«تەرگەۋ بارىسىندا تەرگەۋ ارەكەتتەرى قىلمىستىق-پروتسەستىك زاڭناما تالاپتارىنا سايكەس كەزەڭ-كەزەڭىمەن جۇرگىزىلدى. جينالعان ماتەريالداردىڭ جيىنتىعىن، تەرگەۋ ساتىسىن جانە زاڭدا كوزدەلگەن نەگىزدەردى ەسكەرە وتىرىپ، 23 جەلتوقساندا قازتاگ باس رەداكتورى ۇستالدى. ول استانا قالالىق پوليتسيا دەپارتامەنتىنىڭ ۋاقىتشا ۇستاۋ يزولياتورىنا قامالدى»،- دەلىنگەن حابارلامادا.
ەسكە سالايىق، 23 جەلتوقساندا ءامىر قاسەنوۆتى استانانىڭ ەسىل اۋداندىق پوليتسياسى ۇستاعانى بەلگىلى بولدى.
بۇعان دەيىن قازتاگ Freedom Finance كومپانياسىنداعى «الاياقتىق سحەمالاردان جاپا شەككەندەر» تۋرالى بىرقاتار ماقالا مەن بەينەماتەريال جاريالاعان ەدى. كەيىن اگەنتتىكتىڭ ۇستىنەن كومپانيا ارىز تۇسىرگەن. قازتاگ باسشىلىعى بۇل قىلمىستىق ءىستى ءسوز بوستاندىعىنا قىسىم كورسەتۋگە باعىتتالعان قادام دەپ باعالادى.
11 جەلتوقساندا مادەنيەت جانە اقپارات ءمينيسترى ايدا بالاەۆا ۆەدومستۆو زاڭگەرلەرى باسشىلىعى قىلمىستىق قۋدالاۋعا ۇشىراعان قازتاگ حالىقارالىق اقپاراتتىق اگەنتتىگىنە كومەك كورسەتۋ جولدارىن قاراپ جاتقانىن حابارلاعان.
