ىسىراپشىلدىق – قوعامنىڭ دايەكتى دامۋىنا كەدەرگى

بۇگىن شىمكەنتتەگى دوستىق ۇيىندە قالالىق قحا جانىنداعى انالار كەڭەسىنىڭ ۇيىتقى بولۋىمەن «ىسىراپشىلدىق – قوعامنىڭ دايەكتى دامۋىنا كەدەرگى» تاقىرىبىندا وڭىرلىك فورۋم ءوتتى.  

قوعامداعى ۇنەمشىلدىك مادەنيەتىن قالىپتاستىرۋ، تابيعي رەسۋرستاردى ءتيىمدى پايدالانۋ جانە رۋحاني قۇندىلىقتاردى نىعايتۋ جايى تالقىلانعان فورۋمعا الماتى، شىمكەنت قالالارى جانە الماتى، قىزىلوردا، جامبىل، تۇركىستان وبلىستارىنداعى انالار كەڭەسىنىڭ ءتورايىمدارى، زيالى قاۋىم مەن ەتنومادەني بىرلەستىكتەردىڭ، قوعامدىق قۇرىلىمداردىڭ وكىلدەرى قاتىستى.  

پلەنارلىق وتىرىستى شىمكەنت قالاسى قحا جانىنداعى انالار كەڭەسىنىڭ ءتورايىمى گ.سۇگىرباەۆا جۇرگىزدى. شىمكەنت قالاسى ىشكى ساياسات باسقارماسى باسشىسىنىڭ ورىنباسارى، قالالىق قحا حاتشىلىعىنىڭ مەڭگەرۋشىسى ا.امزەەۆا فورۋمدى اشىپ، بۇگىنگى باسقوسۋدىڭ ماڭىزدىلىعىن اتاپ ءوتتى.

–  ىسىراپشىلدىقتى ارقاۋ ەتكەن جيىندا ايتىلاتىن مازمۇندى وي-پىكىرلەر مەن بايسالدى باستامالاردى ءىلىپ اكەتىپ، ودان ءارى ناسيحاتتاۋعا ارداقتى انالار ايرىقشا اتسالىسادى دەگەن ويدامىز. قوعام بولىپ جۇمىلساق، وسكەلەڭ ۇرپاقتى الەۋمەتتىك كەسەلدەردەن ساقتاندىرىپ، وتباسىلىق قۇندىلىقتاردى دارىپتەۋ جولىندا ىلكىمدى ءىس تىندىرۋعا بولادى دەپ سەنەمىز.
انالار كەڭەستەرىنىڭ سالاۋاتتى، سانالى قوعام قالىپتاستىرۋ جانە ادال ازامات تاربيەلەۋ جولىنداعى جۇمىستارىنا  تابىس تىلەيمىن، – دەدى باسقارما باسشىسىنىڭ ورىنباسارى. 

فورۋمدا «ەنەرگيانى ۇنەمدەۋ:  تۇراقتى  بولاشاققا  اپارار جول» تاقىرىبىندا م.اۋەزوۆ اتىنداعى وقزۋ-دىڭ كافەدرا مەڭگەرۋشىسى گ.تۇرىمبەتوۆا، «ىسىرىپشىلدىقتىڭ الدىن الۋ: اتادان – وسيەت، انادان – قاسيەت» تاقىرىبىندا جامبىل وبلىسى قحا جانىنداعى انالار كەڭەسىنىڭ ءتورايىمى ە.مىرزا-عالي، «وڭتۇستىك ولكەدەگى سۋ تاپشىلىعىنىڭ ماسەلەلەرى» تاقىرىبىندا م.اۋەزوۆ اتىنداعى وقزۋ-دىڭ دوتسەنتى پ.سۇلتانبەكوۆا، «ىسىراپشىلدىققا قارسى مادەنيەت قالىپتاستىرۋ» تاقىرىبىندا تۇركىستان وبلىسى قحا جانىنداعى انالار كەڭەسىنىڭ ءتورايىمى گ.توققۇلوۆا، «رۋحاني تاربيە جانە ۇنەمشىل ءومىر سالتى» تاقىرىبىندا شىمكەنت قالاسى ورتالىق مەشىتى باس يمامىنىڭ ورىنباسارى، ءدىنتانۋشى ي.يمانقۇلۇلى، «جيدەلى» ەلدى مەكەنى – ىشىمدىكسىز اۋىل» تاقىرىبىندا  شىمكەنت قالاسى اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا مۇشەسى و.تاجىباەۆا، «ۇنەمشىلدىك – تۇراقتى دامۋدىڭ نەگىزى» تاقىرىبىندا شىمكەنت قالاسى قحا جانىنداعى عست جەتەكشىسى، ءو.جانىبەكوۆ اتىنداعى وقپۋ-دىڭ دەپارتامەنت ديرەكتورى ق.انارباەۆ  جانە ت.ب. ازاماتتار ءسوز سويلەپ، ىسىراپشىلدىقتىڭ الدىن الۋ جايىندا ۇسىنىستارىن ايتتى.  

بەلسەندى قوعامدىق قىزمەتىمەن دارالانعان انالارعا قازاقستان حالقى اسسامبلەياسى مەن رەسپۋبليكالىق انالار كەڭەسىنىڭ العىس حاتى تابىستالدى. 
پلەنارلىق وتىرىستىڭ قورىتىندىسىمەن فورۋمعا قاتىسۋشىلار قوعامدى ۇنەمشىلدىككە، جاۋاپتى تۇتىنۋعا جانە رۋحاني قۇندىلىقتاردى ساقتاۋعا شاقىرىپ، ۇندەۋ قابىلدادى. 

ايتا كەتەيىك، فورۋم اياسىندا ەلىمىزدىڭ وڭتۇستىك وڭىرىندەگى انالار كەڭەستەرىنىڭ ءتورايىمدارى مەن مۇشەلەرى شىمكەنت قالاسىنداعى «يبراحيم اتا» جانە «قاراشاش انا» كەسەنەلەرىندە بولىپ، «اروفات» مەكتەبىندە وتەتىن ءىس-شاراعا قاتىسادى. جاس بۋىنعا ساپالى قوسىمشا ءبىلىم بەرۋ باعىتىندا ناتيجەلى جۇمىس ىستەپ كەلە جاتقان №2 وقۋشىلار سارايىن ارالاپ، «Shymkent Creative Hub» ورتالىعىندا شىعارماشىلىق جوبالارمەن جانە م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىندەگى «عىلىمي زەرتحانا» كەشەنىنىڭ تابىستى قىزمەتىمەن تانىسادى.