بۇگىن، 25 جەلتوقسان كۇنى استانادا قالالىق جەدەل مەديتسينالىق جاردەم ستانتسياسىنىڭ بازاسىندا قىزمەتتىك بورىشىن ورىنداۋ كەزىندە قازا تاپقان فەلدشەر ۇلدانا مىرزۋاندى ەسكە الۋعا ارنالعان مەموريالدىق تاقتانىڭ اشىلۋ سالتاناتى ءوتتى. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا ايتتى، دەپ حابارلايدى «ادىرنا» ءتىلشىسى.
ء«بىز ۇلدانانىڭ جادىنا باسىمىزدى يەمىز. ونىڭ ارەكەتى - شىنايى باتىلدىقتىڭ، ادالدىقتىڭ جانە جوعارى بىلىكتىلىكتىڭ مىسالى. ۇلدانا تۋرالى ەستەلىك ول وقىعان مەديتسينالىق كوللەدجدىڭ قابىرعاسىندا ساقتالادى. اۋديتوريالاردىڭ بىرىنە ونىڭ ەسىمى بەرىلەدى. بۇل تەك قۇرمەت بەلگىسى رەتىندە عانا ەمەس، سونىمەن قاتار دارىگەرلەردىڭ بولاشاق ۇرپاقتارى ءۇشىن ەتالون رەتىندە دە ماڭىزدى — ادامدارعا جانە تاڭدالعان ماماندىققا قىزمەت ەتۋدىڭ مىسالى»،-دەدى ول.
مينيستر كوللەدجدى ۇزدىك بىتىرگەننەن كەيىن ۇلدانانىڭ ءتورت جىل بويى ەلوردالىق جەدەل جاردەم قىزمەتىندە فەلدشەر بولىپ جۇمىس ىستەگەنىن اتاپ ءوتتى.
«وسى ۋاقىت ىشىندە ول ارىپتەستەرىنىڭ شىنايى قۇرمەتىنە جانە پاتسيەنتتەردىڭ ريزاشىلىعىنا يە بولدى. مەملەكەت باسشىسىنىڭ جارلىعىمەن قىزمەتتىك بورىشىن ۇلگىلى ورىنداعانى، توتەنشە جاعدايدا كورسەتكەن باتىرلىعى مەن قايسارلىعى ءۇشىن ۇلدانا قالدارحانقىزى مىرزۋان «ەرلىگى ءۇشىن» مەدالىمەن ماراپاتتالعانىن ەستەرىڭىزگە سالا كەتكىم كەلەدى»،-دەپ تولىقتىردى ءالنازاروۆا.
ەسكە سالايىق، 23 جاستاعى فەلدشەر ۇلدانا مىرزۋان 18 قاراشادا العان اۋىر جاراقاتتارى سالدارىنان قايتىس بولعان ەدى.
