قازاقستان پرەزيدەنتى باۋىرجان مومىشۇلىنا «حالىق قاھارمانى» اتاعىن بەرۋ تۋرالى شەشىم قابىلدادى، دەپ حابارلايدى "ادىرنا" ۇلتتىق پورتالى.
ءتيىستى جارلىققا مەملەكەت باسشىسى قول قويدى. بۇل تۋرالى پرەزيدەنتتىڭ ءباسپاسوز حاتشىسى رۋسلان جەلدىباي الەۋمەتتىك جەلىدەگى پاراقشاسىندا حابارلادى.
مەملەكەت باسشىسىنىڭ ايتۋىنشا، كەشە داڭقتى قولباسشى، ۇلى وتان سوعىسىنىڭ باتىرى باۋىرجان مومىشۇلىنىڭ تۋعانىنا 115 جىل تولعان. ونىڭ ەرلىك جولى تەك قازاقستاندا عانا ەمەس، شەتەلدەردە دە كەڭىنەن تانىمال.
پرەزيدەنت باتىردىڭ حالىق اراسىندا قاھارمان رەتىندە قۇرمەتتەلگەنىمەن، وسى ۋاقىتقا دەيىن رەسمي تۇردە «حالىق قاھارمانى» اتاعى بەرىلمەگەنىن اتاپ ءوتتى. بۇل ماسەلەنى وبلىس تۇرعىندارى، زيالى قاۋىم وكىلدەرى مەن جاستار بىرنەشە رەت كوتەرگەن.
«تاريحي ادىلدىكتى قالپىنا كەلتىرۋىمىز كەرەك. سوندىقتان مەملەكەت باسشىسى رەتىندە باۋىرجان مومىشۇلىنا “حالىق قاھارمانى” اتاعىن بەرۋ تۋرالى شەشىم قابىلدادىم»، – دەلىنگەن جازبادا.
سونداي-اق پرەزيدەنت باۋىرجان مومىشۇلىنىڭ ەرلىگى اڭىز ەمەس، ناقتى تاريحي قۇجاتتارمەن دالەلدەنگەنىن، ونى ۇلى وتان سوعىسىنا قاتىسقان باتىرلاردىڭ وزدەرى مويىنداعانىن اتاپ ءوتتى.
مەملەكەت باسشىسىنىڭ پىكىرىنشە، باۋكەڭنىڭ ەسىمى وتانشىلدىق پەن وشپەس ەرلىكتىڭ سيمۆولى رەتىندە ءاردايىم ەلگە ۇلگى بولۋعا ءتيىس.
