يراندا 2025 جىلى 1922 ادام ءولىم جازاسىنا تارتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى Human Rights Activists News Agency ۇيىمى حابارلادى.
ءولىم جازاسىنا تارتىلعانداردىڭ 1681-ى ەر ادام، 59-ى ايەل جانە 2 كامەلەتكە تولماعان ادام بار. بۇل كورسەتكىش 2024 جىلمەن سالىستىرعاندا ەكى ەسەگە جۋىق ءوسىپ، سوڭعى 11 جىلدىڭ ەڭ جوعارى دەڭگەيىنە جەتكەن.
ۇيىم ەسەبىنە سايكەس، كوپشىلىگى ءولىم جازالارى جاسىرىن نەمەسە رەسمي جاريالانباي ورىندالعان. الايدا، 10 ءولىم جازاسى اشىق تۇردە وتكىزىلگەن. سونداي-اق، 168 ءىس بويىنشا شىعارىلعان ءولىم جازالارىنىڭ بەسەۋى جاريا تۇردە ورىندالۋى ءتيىس بولعان. جالپى، 2025 جىلى شىعارىلعان ءولىم جازالارىنىڭ سانى وتكەن جىلمەن سالىستىرعاندا 21,4% تومەندەگەن.
ەلدە ءولىم جازاسىن ادام ءولتىرۋ (47,55%) جانە ەسىرتكىمەن زاڭسىز اينالىسۋ (46,10%) ايىپتارى بويىنشا قولدانعان. سونىمەن قاتار، ءولىم جازاسى سەكسۋالدىق سيپاتتاعى قىلمىستار (1,66%), مەملەكەتتىك جانە ءدىني قۇرىلىمعا قارسى قىلمىستار (1,35%), قاۋىپسىزدىككە قاتىستى قىلمىستار، سونىڭ ىشىندە تىڭشىلىق، تەرروريزم جانە تەراكتىلەر (0,73%), «قۇدايعا قارسى ارەكەتتەر» (0,68%), ەكونوميكالىق قىلمىستار (0,50%), قارۋلى توناۋ (0,50%) جانە «جەردە جەمقورلىقتى تاراتۋ» (0,16%) بويىنشا دا قولدانىلعان.
