بۇگىن وبلىس اكىمى نۇرلىبەك نالىباەۆتىڭ قاتىسۋىمەن قىزىلوردانىڭ سول جاعالاۋىندا بوي كوتەرگەن توعىز قاباتتى 120 پاتەرلىك ەكى تۇرعىن ءۇيدىڭ كىلتىن كەزەكتە تۇرعان وتباسىلارعا تابىستاۋ ءراسىمى ءوتتى.
وعان پارلامەنت سەناتىنىڭ دەپۋتاتتارى ناۋرىزباي بايقاداموۆ، رۋسلان رۇستەموۆ، قۇقىق قورعاۋ ورگاندارىنىڭ ءبىرىنشى باسشىلارى، اۋدان اكىمدەرى مەن ارنايى كەلگەن دەلەگاتتار، زيالى قاۋىم وكىلدەرى مەن ەل اعالارى قاتىستى.
ايماق باسشىسى جىل الماسار شاقتاعى جاڭالىقتارعا، قۇرىلىس، ونىڭ ىشىندە تۇرعىن ءۇي قۇرىلىسى سالاسىنداعى جەتىستىكتەرگە توقتالىپ، جاڭا پاتەر يەلەرىن قونىستويمەن قۇتتىقتادى.
«بارشاڭىزدى الداعى جاڭا جىل مەرەكەسىمەن شىن جۇرەكتەن قۇتتىقتايمىن! 2025 ەلىمىز ءۇشىن دە، ءوڭىرىمىز ءۇشىن دە بىرلىك پەن بەرەكەنىڭ، تۇراقتىلىق پەن تاتۋلىقتىڭ، جاسامپازدىق پەن جارقىن ىستەردىڭ جەمىستى جىلى بولدى.
پرەزيدەنتىمىزدىڭ، ۇكىمەتتىڭ قولداۋىمەن وڭىرىمىزدە سەرپىندى جوبالار جۇزەگە اسىپ، الەۋمەتتىك-ەكونوميكالىق دامۋ باعىتىندا وڭ تەندەنتسيا قالىپتاستى. ايماق نەگىزگى ماكروەكونوميكالىق كورسەتكىشتەر بويىنشا رەسپۋبليكادا العاشقى ورىنداردان كورىندى. جالپى وڭىرلىك ءونىم كولەمى جىل قورىتىندىسىمەن 3 ترلن. 700 ملرد. تەڭگەگە جەتىپ، 6,5 پايىزدىق ءوسىم قامتاماسىز ەتىلدى. وبلىس بيۋدجەتى 851 ملرد. 300 ملن. تەڭگە بولىپ، 2021 جىلدان بەرى 246 پايىز ءوستى. ونىڭ 56 پايىزى الەۋمەتتىك سالاعا باعىتتالدى. دامۋ بيۋدجەتىنىڭ كولەمى بيىل 207 ملرد. تەڭگەگە جەتىپ، 2021 جىلمەن سالىستىرعاندا 4,4 ەسە ارتتى.
وڭىرىمىزدە قولايلى ينۆەستيتسيالىق كليمات قالىپتاسىپ، جاڭا ءىرى ينۆەستيتسيالىق جوبالار جۇزەگە اسۋدا. تۇرعىنداردىڭ ءومىر ءسۇرۋ ساپاسىن جاقسارتۋ ءۇشىن باسپانامەن قامتۋدا، ينفراقۇرىلىمدى قايتا جاڭعىرتۋدا ءتيىستى شارالار قابىلداندى.
مەملەكەت باسشىمىزدىڭ، ۇكىمەتتىڭ قولداۋىمەن قىزىلوردا قارقىندى قۇرىلىس الاڭىنا اينالدى. 2022 جىلدان بەرى 200-گە جۋىق الەۋمەتتىك نىسان سالىنىپ، ەل يگىلىگىنە بەرىلدى.
بۇگىن – مەملەكەت قولداۋىمەن باسپانالى بولعان بارشاڭىزعا ەرەكشە كۇن! قونىستارىڭىز قۇتتى بولسىن!»، – دەدى ن. نالىباەۆ.
راسىمدە تۇرعىن ءۇيدى ساپالى سالعان قۇرىلىسشىلار وبلىس اكىمىنىڭ العىس حاتىمەن ماراپاتتالىپ، ناۋرىزباي بايقاداموۆ قۇتتىقتاۋ لەبىزىن جەتكىزدى. قوعام قايراتكەرى باقبەرگەن دوسمانبەتوۆ باتا بەردى.
ەسكە سالايىق، 2022-2024 جىلدارى تۇرعىن ءۇي كەزەگىندە تۇرعان ازاماتتارعا 5 مىڭنان استام پاتەر تابىستالدى. كەيىنگى ءۇش جىلدا العاش رەت بارلىق اۋداندا 1800-گە جۋىق جاڭا پاتەر جەرلەستەرىمىزدىڭ يگىلىگىنە اينالدى. بيىل 3600 پاتەرلىك تۇرعىن ءۇي سالۋعا بيۋدجەتتەن 58 ملرد. 785 ملن. تەڭگە ءبولىندى.
ەرەكشە اتاپ ءوتۋ قاجەت، وتكەن جىلدان بەرى قالامىزدا زاماناۋي جاڭا ديزاينمەن جەتى، توعىز، ون ەكى قاباتتى تۇرعىن ۇيلەر بوي كوتەرۋدە.
