بۇگىن، 9 قاڭتاردا استانانىڭ قىلمىستىق ىستەر بويىنشا اۋدانارالىق سوتىندا ەرلى-زايىپتى داۋلەت پەن تولقىن توتاقانوۆانىڭ ءىسى بويىنشا سوت ۇكىمى جاريالاندى. ولار بالاسىنىڭ ەمىنە جينالعان قاراجاتتى ۇرلادى دەپ ايىپتالعان، دەپ حابارلايدى "ادىرنا".
سوت توراعاسى قانات توباعاليۇلى تولقىن مەن داۋلەت توتاقانوۆتى قازاقستان رەسپۋبليكاسىنىڭ قىلمىستىق كودەكسىنىڭ ەكى بابىمەن كىنالى دەپ تانىدى:
- 190-باپ، 4-ءبولىم، 2-تارماق ("الاياقتىق");
- 218-باپ، 2-ءبولىم، 1-تارماق ("قىلمىستىق جولمەن الىنعان اقشا مەن (نەمەسە) مۇلىكتى زاڭداستىرۋ (تازالاۋ)").
"قر قك 58-بابىنىڭ 3-بولىمىنە سايكەس، قىلمىستاردىڭ جيىنتىعى بويىنشا جازالاردى قوسۋ ارقىلى تولقىن توتاقانوۆاعا 7 جىل باس بوستاندىعىنان ايىرۋ، قاراجات جيناۋمەن بايلانىستى قايىرىمدىلىق قىزمەتىمەن اينالىسۋ قۇقىعىنان 10 جىلعا ايىرۋ جانە مۇلكىن تاركىلەۋ جازاسى تاعايىندالسىن. قر قك 74-بابىنىڭ 1-بولىمىنە سايكەس، جازا 2 جىلعا كەيىنگە قالدىرىلسىن", – دەدى سوت توراعاسى.
داۋلەت توتاقانوۆقا دا 7 جىل باس بوستاندىعىنان ايىرۋ، قاراجات جيناۋمەن بايلانىستى قايىرىمدىلىق قىزمەتىمەن اينالىسۋ قۇقىعىنان 10 جىلعا ايىرۋ جانە مۇلكىن تاركىلەۋ جازاسى تاعايىندالدى.
بۇعان دەيىن جۇبايلار ۇيقاماقتا بولعان. داۋلەت توتاقانوۆ سوت زالىندا قاماۋعا الىندى.
توتاقانوۆتار سوت بارىسىندا وزدەرىن فوتو-ۆيدەوعا تۇسىرۋگە قارسى بولدى. الايدا سوت ۇكىمىنەن كەيىن تولقىن توتاقانوۆا ۇكىمگە كەلىسپەيتىنىن، شاعىم تۇسىرەتىنىن ايتتى.
«كىنامىز جوق ەكەنىن دالەلدەدىك. بىزدە ميلليارد اقشا جوق. 30 ميلليون تەڭگە قارىز الىپ، 700 ميلليون تەڭگە قىلىپ قايتاردىق. بەس جىل بويى ۇستىندەگى پايىزىن تولەپ كەلدىك. ولاردىڭ ۇستىنەن شاعىمداندىق، ول ىستە ءبىز جابىرلەنۋشىمىز»، – دەيدى تولقىن توتاقانوۆا.
تەرگەۋ دەرەگىنشە، 2020-2024 جىلدارى توتاقانوۆتار Instagram جەلىسىندە ۇلىنا قويىلعان دياگنوز تۋرالى ايتىپ، بالانىڭ ەمىنە اقشا جيناعان. الەۋمەتتىك جەلىدە ەموتسياعا تولى ۆيدەو جاريالاپ، ءارى قاراي تاراتىپ وتىرعان. ناتيجەسىندە ەرلى-زايىپتى 1,3 ملرد تەڭگە جيناعان، الايدا بالانىڭ ەمىنە نەبارى 6,4-6,5 ملن تەڭگە جۇمساعان.
قالعان اقشا استانادان ءۇش پاتەر، جەر تەلىمىن، بەس اۆتوكولىك ساتىپ الۋعا، برەند كيىم-كەشەككە، شەتەلگە شىعۋعا جانە بۋكمەكەرلىك كەڭسەلەردەگى ستاۆكالارعا جۇمسالعان. قاراجاتتىڭ ءبىر بولىگى (481 ملن تەڭگەدەن استامى) الەۋمەتتىك جەلىدەگى پاراقشانى ىلگەرىلەتۋگە باعىتتالعان
