2023 جىلدىڭ 18 ماۋسىمىندا استانادا Kaspi bank بولىمشەسىنە شابۋىل جاساعان ەر ادامعا سوت ۇكىمى شىقتى. بۇل تۋرالى ءىستى قاراعان استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ سۋدياسى ابينۋر قاراباەۆ ونىڭ كىناسى دالەلدەنگەنىن مالىمدەدى، دەپ حابارلايدى “ادىرنا” ۇلتتىق پورتالى.
سوت ۇكىمىمەن اليحان مۋرادوۆ 7,5 جىلعا باس بوستاندىعىنان ايىرىلدى. ول جازاسىن قاۋىپسىزدىگى ورتاشا مەكەمەدە وتەيدى.
ءاليحان مۋرادوۆ قىلمىستىق كودەكستىڭ 261-بابى 2-بولىگى 8 جانە 9 تارماعى بويىنشا كىنالى دەپ تانىلسىن جانە وعان 7 جىل 6 اي باس بوستاندىعىنان ايىرۋ تۇرىندە جازا تاعايىندالسىن، - دەدى سۋديا ابينۋر قاراباەۆ.بۇعان دەيىن ءجارىسسوز بارىسىندا پروكۋرور ونى 8 جىلعا باس بوستاندىعىنان ايىرۋدى سۇرادى. جازانى جەڭىلدەتەتىن جاعداي رەتىندە ايىپتالۋشىنىڭ كىناسىن مويىنداۋى جانە تەرگەۋگە كومەكتەسكەنى ەسكەرىلدى. ەسكە سالساق، 18 ماۋسىمدا استانادا قارۋلانعان ەر ادام بانكتەردىڭ بىرىندە قىزمەتكەرلەردى كەپىلگە العان بولاتىن. پوليتسيا كەيىننەن شابۋىل جاساعان ەر ادامدى ۇستاپ، قىزمەتكەرلەردى عيماراتتان شىعاردى. باس پروكۋراتۋرانىڭ مالىمەتىنشە، بۇرىن بىرنەشە مارتە قىلمىستىق جاۋاپقا تارتىلعان 1993 جىلعى جامبىل وبلىسىنىڭ تۋماسى مۋرادوۆ 2013 جىلدان ەسىرتكىگە تاۋەلدى ادامدار ەسەبىندە تۇر.
