7 جىلعا سوتتالعان گۇلميرا ساتىبالدى جابىرلەنۋشى تۇرسىنعالي الاگوزوۆكە 6,5 ملرد تەڭگە كولەمىندە ماتەريالدىق زالالدى وتەيدى. بايقوڭىر اۋدانىنىڭ №2 سوتىنىڭ سۋدياسى كەمەڭگەر يماشەۆ تۇرسىنعالي الاگوزوۆتىڭ مورالدىق جانە ماتەريالدىق شىعىندى وتەۋ تۋرالى ازاماتتىق تالابىن ءىشىنارا قاناعاتتاندىردى، دەپ حابارلايدى “ادىرنا” ۇلتتىق پورتالى.
شەشىمگە سايكەس، سوتتالعان گۇلميرا ساتىبالدى جابىرلەنۋشى الاگوزوۆتىڭ پايداسىنا 6,5 ملرد تەڭگە كولەمىندە ماتەريالدىق زالالدى GALANZ bottlers اق-نىڭ 43,25% جاي اكتسياسىن زاتتاي قايتارۋ ارقىلى وتەيدى.
مورالدىق زالال كولەمى 1 ملن تەڭگە دەپ ەسەپتەلدى.
بۇعان دەيىن تۇرسىنعالي الاگوزوۆ ازاماتتىق تالاپ-ارىز رەتىندە سوتتان وزىنە تيەسىلى 43,25% اكتسيانى قايتارۋدى سۇرادى. ايتۋىنشا، بۇل اق جۇمىسىن جالعاستىرۋ ءۇشىن قاجەت. ال مورالدىق شىعىن رەتىندە 35% اكتسيانى ءوندىرۋدى سۇرادى.
«ادام ۇرلاۋ جانە وزىنشە بيلىك ەتۋگە قاتىستى ءىس ەكى ايعا جۋىق ۋاقىتتان بەرى جالعاسىپ جاتىر. ال مەن كورگەن ازاپ پەن ۋايىم شامامەن بەس جىلعا سوزىلدى. مۇنىڭ ءبارىنىڭ ارتىندا ساتىبالدىنىڭ زاڭسىز ارەكەتتەرى تۇر. ونىڭ بارلىق ارەكەتى بۇرىنعى كۇيەۋى قايرات ساتىبالدىنىڭ باسشىلىعىمەن جاسالدى. شىن مانىندە ەشقانداي دەفولت بولعان جوق جانە ونىڭ ءبارى قولدان جاسالدى. ساتىبالدى كومپانيانى دەفولت جاعدايىنان شىعارۋدىڭ سەبەبىن ويلاپ تاۋىپ، وزىنە ەشقانداي قاتىسى جوق كومپانيانى «قۇتقاراتىنىن» ايتتى. وسىلايشا ءوزىن قازاقستاندىق كومپانيالارعا كومەكتەسەتىن قامقور ايەل سياقتى كورسەتىپ وتىر. الايدا ول مەنەن، ياعني كومپانيا قۇرىلتايشىسىنان جانە ءىرى اكتسيونەردەن كومەك العىڭ كەلە مە دەپ سۇرامادى. سول ارقىلى قازاقستاندىق بيزنەس قوعامداستىق الدىندا مەنىڭ بەدەلىمدى ءتۇسىردى»، - دەدى تۇرسىنعالي الاگوزوۆ.
ەسكە سالايىق، 2023 جىلدىڭ 4 مامىرىندا گۇلميرا ساتىبالدىعا سوت ۇكىمى شىقتى. ول 7 جىلعا باس بوستاندىعىنان ايىرىلدى. جازاسىن قاۋىپسىزدىگى ورتاشا مەكەمەدە وتەيدى. ءىس بويىنشا مادي باتىرشاەۆ 7 جىلعا باس بوستاندىعىنان ايىرىلدى، راشيد وتەبەكوۆ 5 جىلعا سوتتالدى.
