7 jylǵa sottalǵan Gúlmıra Satybaldy jábirlenýshi Tursynǵalı Alagózovke 6,5 mlrd teńge kóleminde materıaldyq zalaldy óteıdi. Baıqońyr aýdanynyń №2 sotynyń sýdıasy Kemeńger Imashev Tursynǵalı Alagózovtiń moraldyq jáne materıaldyq shyǵyndy óteý týraly azamattyq talabyn ishinara qanaǵattandyrdy, dep habarlaıdy “Adyrna” ulttyq portaly.
Sheshimge sáıkes, sottalǵan Gúlmıra Satybaldy jábirlenýshi Alagózovtiń paıdasyna 6,5 mlrd teńge kóleminde materıaldyq zalaldy GALANZ bottlers AQ-nyń 43,25% jaı akııasyn zattaı qaıtarý arqyly óteıdi.
Moraldyq zalal kólemi 1 mln teńge dep esepteldi.
Buǵan deıin Tursynǵalı Alagózov azamattyq talap-aryz retinde sottan ózine tıesili 43,25% akııany qaıtarýdy surady. Aıtýynsha, bul AQ jumysyn jalǵastyrý úshin qajet. Al moraldyq shyǵyn retinde 35% akııany óndirýdi surady.
«Adam urlaý jáne ózinshe bılik etýge qatysty is eki aıǵa jýyq ýaqyttan beri jalǵasyp jatyr. Al men kórgen azap pen ýaıym shamamen bes jylǵa sozyldy. Munyń báriniń artynda Satybaldynyń zańsyz áreketteri tur. Onyń barlyq áreketi burynǵy kúıeýi Qaırat Satybaldynyń basshylyǵymen jasaldy. Shyn máninde eshqandaı defolt bolǵan joq jáne onyń bári qoldan jasaldy. Satybaldy kompanııany defolt jaǵdaıynan shyǵarýdyń sebebin oılap taýyp, ózine eshqandaı qatysy joq kompanııany «qutqaratynyn» aıtty. Osylaısha ózin qazaqstandyq kompanııalarǵa kómektesetin qamqor áıel sııaqty kórsetip otyr. Alaıda ol menen, ıaǵnı kompanııa quryltaıshysynan jáne iri akıonerden kómek alǵyń kele me dep suramady. Sol arqyly qazaqstandyq bıznes qoǵamdastyq aldynda meniń bedelimdi túsirdi», - dedi Tursynǵalı Alagózov.
Eske salaıyq, 2023 jyldyń 4 mamyrynda Gúlmıra Satybaldyǵa sot úkimi shyqty. Ol 7 jylǵa bas bostandyǵynan aıyryldy. Jazasyn qaýipsizdigi ortasha mekemede óteıdi. Is boıynsha Madı Batyrshaev 7 jylǵa bas bostandyǵynan aıyryldy, Rashıd Ótebekov 5 jylǵa sottaldy.
