يراننىڭ قازاقتار تۇراتىن ايماعى گولەستان پروۆينتسياسىندا تارتىپسىزدىكتەردى ۇيىمداستىرۋشىلاردىڭ بىرقاتارى ۇستالدى، قالعاندارى تەرگەۋدە جانە جاقىن ارادا قاماۋعا الىنادى. بۇل تۋرالى گولەستان پروۆينتسياسىنىڭ سوت بيلىگى باسقارماسى مالىمدەدى، دەپ حابارلايدى “ادىرنا” ۇلتتىق پورتالى Report اگەنتتىگىنە سىلتەپ.
مالىمەتكە سايكەس، پروۆينتسيا ورتالىعى گورگان قالاسىندا بولعان تارتىپسىزدىكتەر بارىسىندا ءتورت بانكتىڭ عيماراتى قيراعان، تاعى ەكى بانكتىڭ عيماراتىنا 50 پايىز كولەمىندە زالال كەلتىرىلگەن.
سونىمەن قاتار، گورگاندا اكىمشىلىك عيماراتى ورتەنگەن.
ايتا كەتسەك، يران قازاقتارىنىڭ ءبىر بولىگى 1995 جىلى تاريحي وتانىنا ورالدى. ولاردىڭ ءبىرازى ماڭعىستاۋ وبلىسىنا قونىستاندى. سول جىلى يرانداعى قازاقتاردىڭ شامامەن جارتىسى قازاقستانعا كوشىپ كەلدى دەلىنەدى. يراندا قالعان قازاق دياسپوراسى قازىر نەگىزىنەن بۇرىنعى مازەنداران، قازىرگى گولەستان پروۆينتسياسىنداعى گورگان، ءباندار-تۇركىمەن جانە گۇمباد-قابۋس قالالارىندا تۇرادى.
يراندا جارتى ايعا جۋىق ۋاقىتتان بەرى نارازىلىق جالعاسىپ جاتىر. سوڭعى كۇندەرى كۇشەيە تۇسكەن نارازىلىقتا بيلىك كۇشتەرىمەن قاقتىعىس بولىپ، جۇزدەگەن ادام قازا تاپقان. جارالانعاندار مىڭداپ سانالادى. ەلدە سوڭعى 3-4 كۇندە ينتەرنەت جانە تەلەفون بايلانىسى تولىقتاي وشىرىلگەن. ۇلتتىق ۆاليۋتا باعامىنىڭ ءوسىپ، باعانىڭ قىمباتتاۋىنان تۋىنداعان نارازىلىق سوڭى ساياسي تالاپتارعا ۇلاستى. ادامدار بيلىك باسىنداعى ءدىن ادامدارى ورىندارىنان كەتكەنشە نارازىلىقتى جالعاستىراتىنىن ايتىپ، ۇرانداپ ءجۇر. نارازىلىقتى اقش پرەزيدەنتى دونالد ترامپ جانە وزگە دە باتىس ەلدەرى قولدايتىنىن بىلدىرگەن. بيلىك سوڭعى 2-3 تاۋلىكتە شەرۋگە شىققانداردى اياۋسىز باسىپ-جانىشتاۋعا كىرىسكەن. بىراق نارازىلىققا شىققاندار دا كوشەگە جينالۋىن ودان سايىن ۇدەتىپ كەلەدى. ارادا ارانداتۋشىلاردىڭ بولعانى جايىندا دا ايتىلادى.
