مەملەكەت باسشىسى قاسىم-جومارت توقاەۆ اق ءۇي باسشىسى دونالد ترامپتان گازاداعى بەيبىتشىلىك كەڭەسىنە قوسىلۋعا رەسمي شاقىرۋ الدى. بۇل تۋرالى پرەزيدەنتتىڭ كومەكشىسى – ءباسپاسوز حاتشىسى رۋسلان جەلدىباي مالىمدەدى، دەپ حابارلايدى «ادىرنا» ءتىلشىسى.
سونىمەن قاتار ەلىمىزگە بۇل كەڭەستىڭ قۇرىلتايشى مەملەكەتتەرىنىڭ ءبىرى بولۋ ۇسىنىلعان.
«قاسىم-جومارت توقاەۆ اقش پرەزيدەنتىنە شىنايى العىس ءبىلدىرىپ، حات جولدادى جانە بۇل جاڭا بىرلەستىككە قوسىلۋعا كەلىسىمىن راستادى. ول قازاقستاننىڭ تاياۋ شىعىستا تۇراقتى بەيبىتشىلىك ورناتۋعا، مەملەكەتارالىق سەنىمدى نىعايتۋعا جانە جاھاندىق تۇراقتىلىققا ءوز ۇلەسىن قوسۋعا دايىن ەكەنىن اتاپ ءوتتى»، – دەدى جەلدىباي.
ايتا كەتەيىك، اقش-تىڭ بەيبىتشىلىك جوسپارى 2025 جىلعى قازاندا كۇشىنە ەنگەن ەدى. ءبىرىنشى كەزەڭدە حاماس پەن يزرايل اتىستى توقتاتۋ، كەپىلدەر مەن تۇتقىنداردى ايىرباستاۋ، گۋمانيتارلىق كومەك كولەمىن ارتتىرۋعا كەلىسكەن.
بەيبىتشىلىك كەڭەسىنىڭ قۇرامىنا اقش مەملەكەتتىك حاتشىسى ماركو رۋبيو، اقش پرەزيدەنتىنىڭ ارنايى ەلشىسى ستيۆ ۋيتكوفف، ترامپتىڭ كۇيەۋ بالاسى دجارەد كۋشنەر، ۇلىبريتانيانىڭ بۇرىنعى پرەمەر-ءمينيسترى توني بلەر، امەريكالىق ميللياردەر مارك روۋەن، دۇنيەجۇزىلىك بانك باسشىسى ادجاي بانگا، اقش ۇلتتىق قاۋىپسىزدىك كەڭەسىنىڭ ورىنباسارى روبەرت گابريەل كىرگەن.
