قاراعاندى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى جانە وليمپيادا چەمپيونى سەرىك ساپيەۆ بىرنەشە كۇن بۇرىن ءوز ورىنباسارىمەن بولعان وقيعاعا قاتىستى تۇسىنىكتەمە بەردى، دەپ حابارلايدى "ادىرنا".
«قۇرمەتتى قازاقستاندىقتار! ەڭ الدىمەن، قولداۋ بىلدىرگەن بارشاڭىزعا العىس ايتامىن. حالىقتىڭ قولداۋى – مەن ءۇشىن ەڭ ۇلكەن قۇندىلىق. بولعان وقيعاعا بايلانىستى ناقتىلاپ ايتقىم كەلەدى»، – دەدى ول.
وليمپيادا چەمپيونى سول كۇنگى جانجالدىڭ جەكە نەمەسە تۇرمىستىق سيپاتتا ەمەس ەكەنىن اتاپ ءوتتى.
«ايماقتا جاسىرىن ىقپالى بار كەيبىر ادامدار تاراپىنان قارسىلىققا تاپ بولدىم. وبلىستىق سپورت ۇيىمدارىنىڭ باسشىلارىن زاڭسىز روتاتسيالاۋعا ارەكەت جاسالىپ، وعان مەنىڭ ورىنباسارىم دا قاتىسقان. مەن بۇل زاڭسىز ارەكەتتەردى توقتاتتىم، سونىڭ سالدارى وسى جاعدايعا اكەلدى. اشىق مالىمدەيمىن! مەملەكەت باسشىسى ايتقانداي، قازاقستاندىق سپورتتاعى جۇيەلى رەفورمالاردى جۇزەگە اسىرۋ جولىنداعى مۇنداي ارانداتۋشىلىقتار ءبىزدىڭ شەشىمىمىزدى شايقالتپايدى. بارلىقتارىڭىزعا راحمەت! قازاقتىڭ كۇشى – بىرلىكتە!» – دەدى ول.
ايتا كەتەيىك، بۇعان دەيىن وليمپيادا چەمپيونى سەرىك ساپيەۆتى ۇرىپ تاستادى دەگەن اقپارات تاراعان ەدى. الايدا كەيىننەن الەۋمەتتىك جەلىدە سەرىك ساپيەۆتىڭ تاياق جەمەگەنى تەك ورىنباسارىمەن كەلىسپەي قالعانى تۋرالى ۆيدەو تارادى.
