Qaraǧandy oblysynyŋ Dene şynyqtyru jäne sport basqarmasynyŋ basşysy jäne Olimpiada chempiony Serık Säpiev bırneşe kün būryn öz orynbasarymen bolǧan oqiǧaǧa qatysty tüsınıkteme berdı, dep habarlaidy "Adyrna".
«Qūrmettı qazaqstandyqtar! Eŋ aldymen, qoldau bıldırgen barşaŋyzǧa alǧys aitamyn. Halyqtyŋ qoldauy – men üşın eŋ ülken qūndylyq. Bolǧan oqiǧaǧa bailanysty naqtylap aitqym keledı», – dedı ol.
Olimpiada chempiony sol küngı janjaldyŋ jeke nemese tūrmystyq sipatta emes ekenın atap öttı.
«Aimaqta jasyryn yqpaly bar keibır adamdar tarapynan qarsylyqqa tap boldym. Oblystyq sport ūiymdarynyŋ basşylaryn zaŋsyz rotasiialauǧa äreket jasalyp, oǧan menıŋ orynbasarym da qatysqan. Men būl zaŋsyz äreketterdı toqtattym, sonyŋ saldary osy jaǧdaiǧa äkeldı. Aşyq mälımdeimın! Memleket basşysy aitqandai, qazaqstandyq sporttaǧy jüielı reformalardy jüzege asyru jolyndaǧy mūndai arandatuşylyqtar bızdıŋ şeşımımızdı şaiqaltpaidy. Barlyqtaryŋyzǧa rahmet! Qazaqtyŋ küşı – bırlıkte!» – dedı ol.
Aita keteiık, būǧan deiın Olimpiada chempiony Serık Säpievtı ūryp tastady degen aqparat taraǧan edı. Alaida keiınnen äleumettık jelıde Serık Säpievtıŋ taiaq jemegenı tek orynbasarymen kelıspei qalǧany turaly video tarady.
