FlyDubai ūşaǧyn tötenşe jaǧdaida Ukraina men Reseiden kelgen jolauşy-ūşqyştar qondyrdy. Būl turaly Israel Hayom basylymy jazdy, dep habarlaidy «Adyrna» tılşısı.
«Flydubai äue kompaniiasynyŋ ūşaǧyndaǧy janjalǧa reseilık jäne ukrainalyq ūşqyştar qatysqan boluy mümkın degen aqparat şyndyqqa janaspaidy. Olar oqiǧaǧa qatysuşylar emes, qosymşa ekipaj müşelerı bolǧan jäne ūşaqty aman-esen qondyruǧa kömektesken»,– delıngen habarlamada.
Basylym mälımetınşe, qosymşa ekipaj müşelerı Dubaidan Tel-Avivke baǧyt alǧan reiste jolauşy retınde ūşyp kele jatqan. Tötenşe jaǧdaiǧa deiın olar ūşaqty basqaruǧa qatyspaǧan. Oqiǧadan keiın reseilık jäne ukrainalyq ūşqyştar ūşqyştar kabinasyna kırıp, basqarudy öz qoldaryna alyp, Boeing ūşaǧyn Saud Arabiiasynyŋ Tabuk qalasyna sättı qondyrǧan.
30 qyrküiek künı taŋerteŋ N12 telearnasy janjal reseilık ūşqyş pen ukrainalyq ekınşı ūşqyş arasynda bolǧan dep mälımdegen edı. Keiın töbeleske qatysuşylardyŋ azamattyǧyna qatysty özge de mälımetter tarai bastady. Al Flydubai kompaniiasy negızgı ekipaj müşelerınıŋ kım ekenın jäne oqiǧanyŋ naqty män-jaiyn äzırge jariialaǧan joq.
Oqiǧadan keiın äue kompaniiasynda qauıpsızdık şaralary küşeitıldı. Israel Hayom basylymynyŋ jazuynşa, endı Flydubai ekipajdary mūqiiat tekseruden ötedı.
Sonymen qatar İzrail bilıgı Saud Arabiiasynda qalyp qoiǧan öz azamattaryn elge qaitaruǧa daiyndalyp jatyr. Ol üşın arnaiy evakuasiialyq reis ūiymdastyru josparlanǧan. Alaida onyŋ ūşuy aldymen Saud Arabiiasy bilıgınıŋ kelısımın aluy tiıs.
Aita keteiık, tötenşe oqiǧa 30 qyrküiek künı taŋerteŋ Dubaidan Tel-Avivke baǧyt alǧan FZ1073 reisınde bolǧan. Ūşu kezınde Boeing 737 dabyl signaldaryn, onyŋ ışınde äue kemesın zaŋsyz basyp alu nemese basqaruǧa aralasu qaupı tuyndaǧanda qoldanylatyn arnaiy kodty jıbergen. Sonymen qatar ūşaq biıktıgın kürt joǧaltqan. Reuters agenttıgınıŋ mälımetınşe, ol 30 sekundqa jetpeitın uaqyt ışınde şamamen 14 myŋ futqa (4,3 şaqyrymǧa juyq) tömendegen.
İzraildık derekközder ūşqyştar kabinasynda fizikalyq janjal bolǧanyn habarlady. Nūsqalardyŋ bırıne säikes, ekınşı ūşqyş äue kemesınıŋ kapitanyna şabuyl jasaǧan. Qazırgı uaqytta İzrail bilıgı būl oqiǧanyŋ terrorlyq äreketke qatysy bar-joǧyn tekserıp jatyr. Oqiǧanyŋ naqty sebebı äzırge anyqtalǧan joq.
Oqiǧadan keiın Boeing baǧytyn özgertıp, Saud Arabiiasynyŋ Tabuk äuejaiyna qonǧan. Flydubai kompaniiasy oqiǧany rastap, barlyq jolauşynyŋ qauıpsız ekenın mälımdedı. Äue tasymaldauşysy qūzyrly organdarmen bırlesıp jūmys ıstep jatqanyn jäne rastalǧan aqparat tüsken soŋ qosymşa mälımet beretının habarlady.
