قىرعىزستان رەسەيدىڭ ەڭبەك ميگرانتتارىنا قاتىستى كەلىسىم تالاپتارىن ورىنداماۋىنا بايلانىستى ەۋرازيالىق ەكونوميكالىق وداقتىڭ سوتىنا تالاپ-ارىز جولدادى. بۇل تۋرالى مىندەتتى مەديتسينالىق ساقتاندىرۋ قورىنىڭ توراعاسى ازامات مۇقانوۆ ايتتى، دەپ حابارلايدى «ادىرنا» ءتىلشىسى.
ول رەسەيدىڭ ەاەو كەلىسىمدەرىندە كورسەتىلگەن تالاپتاردى ورىنداماي وتىرعانىن جەتكىزدى.
«مىندەتتى مەديتسينالىق ساقتاندىرۋ ءپوليسى رەسەيدە جۇمىس ىستەيتىن ەڭبەك ميگرانتتارىنىڭ وتباسى مۇشەلەرىنە دە بەرىلۋى ءتيىس. بۇل كەلىسىمگە بەس مەملەكەت قول قويعان. الايدا رەسەي تاراپى بۇگىنگى كۇنى وسى كەلىسىمنىڭ 96–97-باپتارىن بۇزىپ، ەڭبەك ميگرانتتارىنىڭ وتباسى مۇشەلەرىنە ممس ءپوليسىن بەرۋدەن باس تارتىپ وتىر»، – دەدى ول.
اڭگىمە 2014 جىلى قول قويىلعان ەۋرازيالىق ەكونوميكالىق وداق تۋرالى شارت جونىندە بولىپ وتىر. بۇل قۇجاتتا «ەڭبەك ميگراتسياسى» اتتى ءبولىم بار. وسى ءبولىمنىڭ 96-بابىندا ەاەو ەلدەرى كەلىسىلگەن كوشى-قون ساياساتىن جۇرگىزەتىنى جانە «مۇشە مەملەكەتتەردىڭ ەڭبەك ميگراتسياسى سالاسىنداعى ىنتىماقتاستىعى ادام مەن ازاماتتىڭ قۇقىقتارى مەن بوستاندىقتارىن ساقتاۋ قاعيداتتارىنا نەگىزدەلەتىنى» كورسەتىلگەن. ال 97 جانە 98-باپتاردا ەاەو اياسىندا جۇمىسشى مەن ونىڭ وتباسى مۇشەلەرى ءوزى ەڭبەك ەتەتىن ەلدىڭ ازاماتتارىمەن بىردەي الەۋمەتتىك ساقتاندىرۋ مەن جەدەل مەديتسينالىق كومەك الۋ قۇقىعىنا يە ەكەنى جازىلعان.
وتكەن جىلدىڭ قاراشا ايىندا رەسەي مەملەكەتتىك دۋماسىنىڭ توراعاسى ۆياچەسلاۆ ۆولودين شەتەل ازاماتتارىنا مەديتسينالىق پوليس بەرۋ شارتتارى وزگەرگەنىن حابارلاعان بولاتىن. ەندى ولار ەلدە كەمىندە بەس جىل زاڭدى تۇردە جۇمىس ىستەگەن جاعدايدا عانا تەگىن مەديتسينالىق كومەك الا الادى.
سوت شەشىمى ەكى اپتا ىشىندە شىعادى دەپ كۇتىلۋدە.
