ۋكراينا قارۋلى كۇشتەرى 13 شىلدەگە قاراعان ءتۇنى ازوۆ تەڭىزىندە 15 كەمەگە سوققى جاساعانىن جاريالادى، دەپ حابارلايدى "ادىرنا" ۇلتتىق پورتالى.
ۋكراينا قارۋلى كۇشتەرىنىڭ ۇشقىشسىز جۇيەلەر كۇشتەرىنىڭ قولباسشىسى روبەرت ءبروۆديدىڭ ايتۋىنشا، زاقىمدانعان كەمەلەردىڭ قاتارىندا جەتى مۇناي تانكەرى، بەس قۇرعاق جۇك كەمەسى، ءبىر پاروم جانە ەكى بۋكسير بار.
سونداي-اق بروۆدي 6–13 شىلدە ارالىعىندا ۋكراينا اسكەرى جالپى 105 ءتۇرلى كەمەگە ناتيجەلى سوققى جاساعانىن ايتتى. الايدا بۇل اقپارات تاۋەلسىز دەرەككوزدەر ارقىلى ازىرگە راستالعان جوق. رەسەي تاراپى دا اتالعان حابارلاماعا قاتىستى رەسمي پىكىر بىلدىرمەدى.
Reuters اگەنتتىگىنىڭ حابارلاۋىنشا، ازوۆ تەڭىزىندەگى شابۋىلداردان كەيىن رەسەي ازوۆ–دون تەڭىز كانالى ارقىلى جۇك تاسىمالىن ۋاقىتشا توقتاتقان. بۇل شەشىم رەسەيدىڭ ازوۆ تەڭىزى ارقىلى جۇزەگە اساتىن استىق ەكسپورتىنىڭ شامامەن تورتتەن ءبىر بولىگىنە اسەر ەتۋى مۇمكىن.
ازىرگە كەمە قاتىناسىنىڭ ناقتى قانشا ۋاقىتقا توقتاتىلاتىنى بەلگىسىز.
