قىتايدىڭ سولتۇستىگىندە قار بارىسى شاڭعىشى ايەلگە شابۋىل جاسادى، دەپ حابارلايدى «ادىرنا» ءتىلشىسى.
وقيعا يۋنەسكو-نىڭ بۇكىلالەمدىك گەوپاركى سانالاتىن كەكەتۋوحاي اۋماعىنا كىرەتىن تالات اۋىلى ماڭىندا بولعان.
Daily Mail مالىمەتىنشە، ايەل شاڭعىمەن سىرعاناپ جۇرگەن. قوناقۇيگە قايتىپ بارا جاتقان جولدا ول قار ۇستىندە جاتقان قار بارىسىن بايقاعان. بيلىك وكىلدەرى بۇل اۋماقتا قار بارىسى كورىنگەنىن الدىن الا ەسكەرتىپ، ونىڭ كەز كەلگەن ساتتە شابۋىل جاساۋى مۇمكىن جابايى اڭ ەكەنىن ەرەكشە اتاپ وتكەن. الايدا بۇل ەسكەرتۋ سەلفي جاساۋدى ۇناتاتىن ايەلدى توقتاتپاعان. كۋاگەرلەردىڭ ايتۋىنشا، ول قار بارىسىنا جۇگىرىپ بارىپ، سۋرەتكە قولايلى راكۋرستى تاڭداۋعا تىرىسقان ساتتە جىرتقىش شابۋىل جاساعان.
جانۋار ايەلگە تاپ بەرىپ، ونىڭ بەتىن تىرناعان. كەيىن شاڭعى نۇسقاۋشىسى تاياقتارىن سەرمەپ، جىرتقىشتى ۇركىتىپ، قۋىپ جىبەرگەن.
قازىرگى تاڭدا ايەل جەرگىلىكتى اۋرۋحاناعا جەتكىزىلىپ، ەم قابىلداپ جاتىر. ونىڭ جاعدايى تۇراقتى دەپ باعالانۋدا.
جەرگىلىكتى بيلىك سوڭعى كۇندەرى گەوپارك اۋماعىندا قار بارىستارىنىڭ ءجيى بايقالعانىن ەسكەرتتى. قورىق اكىمشىلىگى قار بارىستارىنىڭ جىرتقىش ءارى اگرەسسياعا بەيىم اڭدار ەكەنىن ايتىپ، ولارعا جاقىنداۋعا جانە ارانداتۋعا قاتاڭ تۇردە بولمايتىنىن جەتكىزدى.
Snow Leopard Trust ۇيىمىنىڭ مالىمەتىنشە، الەمدەگى جابايى قار بارىستارىنىڭ ەڭ كوپ سانى قىتايدا مەكەندەيدى. ەل اۋماعىندا قار بارىستارىنىڭ دۇنيەجۇزىلىك پوپۋلياتسياسىنىڭ شامامەن 60 پايىزى بار.
