ەكىباستۇزداعى قالالىق اۋرۋحانادا دارىگەر مەن مەدبيكەگە شابۋىل جاسادى دەگەن كۇدىكپەن ءۇش ەر ادام ۇستالدى. بۇل تۋرالى پاۆلودار وبلىسىنىڭ پوليتسيا دەپارتامەنتى ايتتى، دەپ حابارلايدى «ادىرنا» ءتىلشىسى.
وقيعا 12 ءساۋىر كۇنى تاڭەرتەڭ بولعان. ماساڭ كۇيدەگى ەر ادام تراۆماتولوگيا پۋنكتىنە مەديتسينالىق كومەك سۇراپ كەلگەن. ونىڭ جانىندا تاعى ەكى ادام بولعان.
«الدىن الا مالىمەت بويىنشا، ەرىپ كەلگەندەر دورەكى مىنەز كورسەتكەن، دارىگەردىڭ ەسكەرتۋىنە اگرەسسيۆتى تۇردە جاۋاپ بەرگەن. بولمەدەن شىعۋدان باس تارتىپ، ولار دارىگەرگە جۇدىرىق جۇمساعان. جاعدايعا ارالاسۋعا تىرىسقان مەدبيكە دە دەنە جاراقاتىن الدى»، – دەپ ءتۇسىندىردى دەپارتامەنت.
جاراقات العان مەديتسينالىق قىزمەتكەرلەر اۋرۋحاناعا جاتقىزىلعان. قازىرگى تاڭدا كۇدىكتىلەردىڭ ەكەۋى ۋاقىتشا ۇستاۋ يزولياتورىنا قامالعان، ءۇشىنشىسى پوليتسيا كۇزەتىمەن ارنايى پالاتادا جاتىر.
پوليتسيا اتالعان فاكتى بويىنشا قىلمىستىق ءىس قوزعادى. دەپارتامەنتتىڭ مالىمەتىنشە، 7 ناۋرىزدان باستاپ قازاقستاندا قىلمىستىق كودەكستىڭ 380-3-بابى كۇشىنە ەنگەن. ول مەديتسينا قىزمەتكەرلەرىنە قاتىستى قورقىتۋ نەمەسە كۇش قولدانۋ ءۇشىن جاۋاپكەرشىلىك قاراستىرادى. بۇل باپ بويىنشا ەڭ جوعارى جازا — 12 جىلعا دەيىن باس بوستاندىعىنان ايىرۋ.
